Inteligjenca Artificiale Kërcënon Mijëra Vende Pune në Nju Jork Që Këtë Vit
Mark Levin, kontrollori financiar i qytetit të Nju Jorkut, ka lëshuar një paralajmërim serioz: Inteligjenca Artificiale (IA) mund të zëvendësojë mijëra punëtorë në qytetin më të madh të SHBA-së që këtë vit, ndonëse theksoi se ndikimi i saj afatgjatë mbetet i paqartë.
Levin, i cili shërben si kontrollor i qytetit, theksoi se IA pritet të sjellë një “transformim rrënjësor” në qendrën globale financiare, duke ndikuar drejtpërdrejt te pagat, pagesat e pensioneve dhe fitimet e Wall Street-it.
Ish-anëtar demokrat i Këshillit Bashkiak, Levin paraqiti skenarë që variojnë nga optimistë, si rritja e prodhueshmërisë, deri te pesimistë, si humbje masive të vendeve të punës. Ai shtoi se politikëbërësit e qytetit kanë një rol kyç në formësimin e ndikimit të IA-së dhe kërkoi masa të menjëhershme, përfshirë krijimin e një rezerve financiare shumë-miliardëshe për të amortizuar pasojat e mundshme ekonomike.
“Nuk ka qytet në Amerikë, dhe ndoshta askund në botë, më të ekspozuar ndaj premtimeve dhe rreziqeve të inteligjencës artificiale sesa Nju Jorku. Dhe ka pak vende me më shumë fuqi për të drejtuar transformimin që po vjen,” tha Levin.
Ai vuri në dukje se Nju Jorku pret qindra kompani që garojnë për t’u shndërruar në një qendër kryesore për Inteligjencën Artificiale të aplikuar. Paralelisht, rreth 1 milion punonjës zyrash në Manhattan përballen me mundësinë e ndikimeve të thella nga kjo teknologji, duke pasqyruar sfidat që ka të ngjarë të shfaqen edhe në qytete të tjera amerikane.