Spanja ka konfirmuar një rast të ri me hantavirus, i lidhur me anijen turistike MV Hondius, e cila ishte në qendër të një shpërthimi që shkaktoi vdekjen e tre personave në fillim të këtij muaji.
Një shtetas spanjoll, i cili ndodhej në karantinë parandaluese në një spital të Madridit, doli pozitiv me virusin, njoftoi Ministria e Shëndetësisë në një deklaratë.
Rasti i ri ka të bëjë me një “kontakt të ngushtë” të një personi të lidhur me shpërthimin fillestar. Pacienti, i cili doli pozitiv, ndodhej nën mbikëqyrje klinike dhe izolim në Spitalin Gómez Ulla, sipas Ministrisë së Shëndetësisë.
Pozitiviteti i pacientit u zbulua gjatë testimit periodik të personave në kontakt me të prekurit nga shpërthimi. Pas konfirmimit, pacienti u transferua në njësinë e izolimit të nivelit të lartë në Spitalin Gómez Ulla dhe u vendos nën mbikëqyrje të specializuar mjekësore, theksoi deklarata.
Hantavirusi është endemik në disa zona të Amerikës së Jugut, por është shumë i rrallë tek njerëzit dhe nuk ishte regjistruar kurrë më parë në një anije turistike. Zyrtarë shëndetësorë globalë dhe amerikanë kanë bërë përpjekje të vazhdueshme për të qetësuar frikën nga një shpërthim më i gjerë.
Ministria spanjolle e Shëndetësisë theksoi se rasti i fundit nuk ndryshon rrezikun për publikun e gjerë, as masat epidemiologjike në fuqi, pasi pacienti ishte tashmë pjesë e sistemit të saj të izolimit.
Periudha e inkubacionit për hantavirusin është deri në gjashtë javë. Nuk janë raportuar vdekje të reja që nga 2 maji, kur shpërthimi u njoftua për herë të parë në Organizatën Botërore të Shëndetësisë.
Njëzet anëtarë të ekuipazhit dhe dy anëtarë të stafit mjekësor zbarkuan nga anija turistike në Holandë javën e shkuar, tha kompania “Oceanwide Expeditions”. Mbërritja e anijes turistike shënoi fundin e udhëtimit të saj shtatë-javor dhe 8,500 miljeve, i cili u prek nga deri në 11 infeksione dhe tre vdekje prej sëmundjes së rrallë.
Shumica e pasagjerëve, përfshirë 18 amerikanë, ndodhen në karantinë në vendet e tyre të origjinës.