Ministria e Planifikimit Hapësinor ka vendosur tabela me emra të rinj rrugësh në veri të Kosovës, një veprim që ka shkaktuar përplasje me udhëheqjen lokale. Ministrja në detyrë, Fitore Pacolli, mori pjesë në vendosjen e këtyre tabelave, por ato u mbuluan menjëherë pas kësaj nga kryetari i Komunës së Mitrovicës së Veriut, Milan Radojeviq, i cili u detyrua t’i heqë mbulesat nga Policia e Kosovës.
Pamjet e publikuara nga mediumi lokal serb “Kossev” tregojnë tabelat e vendosura në rrethrrotullimin në hyrje të Mitrovicës së Veriut. Midis emrave të rinj janë ai i heroit kombëtar Isa Boletini dhe ish-kryeministrit serb, Zoran Gjindjiq.
Para gazetarëve, ministrja Pacolli deklaroi se vendosja e tabelave ishte një proces thjesht teknik dhe se qytetarët ishin të informuar për këtë. Ajo theksoi se emrat ishin miratuar nga Asambleja Komunale vitin e kaluar, gjatë kohës kur komuna drejtohej nga Lëvizja Vetëvendosje. Sipas Pacollit, vendimi kishte ardhur pas punës disamujore të një komisioni për emërtimin e rreth 80 rrugëve.
Megjithatë, kryetari i Mitrovicës së Veriut, Milan Radojeviq, e cilësoi veprimin e ministrisë si “propagandë”, duke theksuar se komuna kishte shfuqizuar vendimin e vitit të kaluar. Radojeviq deklaroi: “Ata i vendosën tabelat në mënyrë të paligjshme dhe në kundërshtim me vendimin e Kuvendit Komunal të Mitrovicës së Veriut. Siç dihet, më 30 janar ne kemi miratuar një vendim që e ka shfuqizuar aktin e mëparshëm për riemërtimin e rrugëve, sepse ishte miratuar në kundërshtim me ligjin, nuk pati debat publik dhe nuk pati komision shumëetnik. Asnjë serb nuk mori pjesë në punën e atij komisioni, kështu që vendimet ishin absolutisht të paligjshme.”
Pas mbulimit të tabelave nga kryetari i komunës, Policia e Kosovës ndërhyri, duke larguar mbulesat nga shenjat e vendosura nga Ministria e Planifikimit Hapësinor.