Sekretari i përgjithshëm i NATO-s, Mark Rutte, ka konfirmuar raportimet se do të reduktohet prania e trupave të saj në Kosovë.
Duke folur para gazetarëve në Bruksel në prag të takimit të ministrave të mbrojtjes të kësaj aleance, Rutte një gjë të tillë e ka cilësuar si një lajm të mirë.
Ai ka thënë se reduktimi i pranisë së NATO-s në Kosovë vjen si pasojë e përmirësimit të situatës së sigurisë.
“Kur shikojmë situatën e sigurisë në Kosovë, ajo që shohim është se në përgjithësi vitin e kaluar ajo vazhdoi të përmirësohet. Prandaj është lajm i mirë për Kosovën. Dhe kjo është arsyeja pse NATO në janar ndërpreu dislokimin e forcave rezervë në Kosovë. Dhe kjo u bë pas dy vjetësh rotacioni të vazhdueshëm”, ka thënë Rutte.
Ai ka thënë se vazhdimisht po shikohet se si më së miri të rregullohet prania e KFOR-it.
Sipas tij, në këtë moment KFOR-i ka një forcë prej rreth 4700 trupash, duke thënë se po shikohet kthimi i pranisë që ishte para vitit 2023.
“Natyrisht kjo do të varet nga rrethanat dhe do të shohim se KFOR-i do të ketë mes 3000 dhe 3500 trupa. Kjo, mendoj unë, reflekton situatën e përmirësuar të sigurisë”, ka thënë Rutte duke përsëritur se misioni i KFOR-it do të mbetet i fokusuar në detyrën bazë që ka.”, ka thënë tutje Rutte.
Ndryshe, para disa ditësh këtë e kishte paralajmëruar edhe komandanti i forcave të NATO-s për Evropën, gjenerali amerikan Alexus Grynkewich.