**Konfirmohen dy raste të Etheve të Nilit Perëndimor në Shkup**
**Shkup** – Dy raste të etheve të Nilit Perëndimor janë konfirmuar laboratorikisht në Klinikën Universitare për Sëmundje Infektive në Shkup. Lajmin e bëri të ditur drejtori i Klinikës, Fadil Cana.
Të dy pacientët janë hospitalizuar dhe ndodhen nën mbikëqyrje të vazhdueshme mjekësore, duke marrë trajtim sipas protokolleve bashkëkohore mjekësore. Cana theksoi se “gjendja e tyre shëndetësore po monitorohet me kujdes”.
Ethet e Nilit Perëndimor janë një sëmundje virale që transmetohet përmes pickimit të mushkonjës së infektuar. Shumica e personave të infektuar nuk shfaqin simptoma ose kanë një formë të lehtë të sëmundjes. Megjithatë, tek një numër i vogël pacientësh, veçanërisht të moshuarit dhe ata me imunitet të dobësuar, mund të zhvillohen komplikime më të rënda neurologjike.
Klinika Universitare për Sëmundje Infektive u bën thirrje qytetarëve të respektojnë me kujdes masat mbrojtëse personale kundër pickimeve të mushkonjave. Këtu përfshihen: përdorimi i repelentëve, veshja e rrobave me mëngë të gjata dhe pantallonave kur jeni jashtë, vendosja e rrjetave mbrojtëse në dritare dhe largimi i ujit të ndenjur nga mjediset ku shumohen mushkonjat.
Aktualisht nuk ka arsye për panik, por është i nevojshëm një kujdes i shtuar, veçanërisht gjatë periudhës së verës kur aktiviteti i mushkonjave është më i lartë.
Qytetarët që shfaqin temperaturë të lartë, dhimbje të forta koke, ngurtësim të qafës, vetëdije të dëmtuar ose shenja të tjera neurologjike pas pickimit të mushkonjës, duhet të kërkojnë menjëherë ndihmë mjekësore.
Klinika mbetet në koordinim të vazhdueshëm me institucionet shëndetësore kompetente dhe monitoron nga afër situatën epidemiologjike. Raportet e fundit evropiane tregojnë se raste të etheve të Nilit Perëndimor janë regjistruar tashmë në rajon këtë sezon, duke theksuar rëndësinë e diagnostikimit në kohë, mbikëqyrjes dhe masave parandaluese.