Kryetari i Aleancës Kosovare të Bizneseve (AKB), Agim Shahini, ka deklaruar se mbi 2 mijë biznese janë shuar në Kosovë gjatë gjashtëmujorit të parë të këtij viti, duke theksuar një trend të përkeqësuar të ndërmarrësisë. Kjo shifër nga AKB-ja është dukshëm më e lartë se të dhënat zyrtare.
Ndërkohë, sipas Agjencisë së Statistikave të Kosovës (ASK), vetëm në maj të këtij viti u regjistruan 1 mijë e 108 biznese të reja, duke shënuar një rënie prej 16.9 për qind krahasuar me muajin e kaluar. Gjithashtu, numri i përgjithshëm i ndërmarrjeve të regjistruara në maj ishte 225 më pak se në të njëjtën periudhë të vitit të kaluar.
Shahini shpjegoi se trendi i ndërmarrësisë në Kosovë po përkeqësohet vazhdimisht. “Ndërkohë që statistikat zyrtare tregojnë një mesatare prej rreth 700 biznesesh të shuara në gjashtëmujorin e parë, Aleanca Kosovare e Biznesit, bazuar në fakte nga terreni dhe informacione nga degët tona rreth Kosovës, vlerëson se numri i kompanive të shuara, pushuara ose të falimentuara për gjashtëmujorin e parë e kalon shifrën 2 mijë,” u shpreh ai. Ai shtoi se shumë biznese kanë ndalur aktivitetin, nuk qarkullojnë, kanë lëshuar lokalet me qira, për shkak të mungesës së fuqisë konkurruese, financiare dhe humbjes së tregut, gjë që çon drejt falimentimit.
Si pasojë e shuarjes së mbi 2 mijë kompanive, Shahini theksoi se mbi 5 mijë punëtorë kanë mbetur pa vende pune. Ai theksoi shqetësimin se falimentimi i bizneseve është çështja kryesore për institucionet dhe AKB-në, duke vënë në pah dallimin mes bizneseve të shuara zyrtarisht dhe atyre që kanë mbyllur aktivitetin jozyrtarisht për shkak të procedurave të rënda.
Kryetari i AKB-së identifikoi disa faktorë dekurajues për zhvillimin e biznesit. Ndër to, ai përmendi konkurrencën e ashpër dhe të padrejtë, çmimin e lartë të energjisë elektrike, politikat joefikase fiskale për financimin e projekteve, dhe procedurat e stërzgjatura për marrjen e licencave dhe lejeve të ndërtimit. Ai kritikoi mungesën e subvencioneve për bizneset e reja në Kosovë, duke theksuar se në shtetet fqinje si Maqedonia dhe Shqipëria, pagat subvencionohen për një periudhë 3-5 vjeçare, ndërsa në Kosovë “tatimohet nga dita e parë e regjistrimit”.
Për të përmirësuar situatën, Shahini kërkoi hapjen e tregut ekonomik, trajtimin e drejtë të të gjitha bizneseve, dhe forcimin e besimit në sistemin juridik dhe qeverisës. Ai theksoi se mosfunksionimi i institucioneve shtetërore, zgjedhjet e shpeshta dhe funksionimi i dobët i parlamentit dhe qeverisë shërbejnë si faktorë dekurajues si për investitorët e huaj, ashtu edhe për ata vendorë. Përmirësimi i klimës biznesore dhe juridike është thelbësor për të krijuar mundësi për investime të reja dhe rritje ekonomike.