Franca dhe Spanja po përballen me zjarre masive pyjore, të cilat kanë detyruar evakuimin e dhjetëra mijëra banorëve. Ndërsa Spanja ndeshet me zjarrin pyjor më të madh të regjistruar ndonjëherë, Franca po kryen një nga evakuimet më të mëdha në Evropë që nga Lufta e Dytë Botërore. Shkencëtarët paralajmërojnë se ngjarje të tilla ekstreme po bëhen gjithnjë e më të shpeshta në mbarë botën.
Të martën, autoritetet franceze evakuuan edhe 4,000 persona shtesë nga vendpushimet në bregun e Atlantikut. Kjo e çon numrin total të të evakuuarve në rreth 224,000 banorë dhe turistë, për shkak të zjarrit të madh në jugperëndim të Francës.
Zjarre të reja shpërthyen pranë Grand Crohot, një vendpushim në Atlantik, në perëndim të Bordosë. Kjo detyroi autoritetet të dislokonin 23 aeroplanë dhe helikopterë për të kontrolluar flakët.
Sophie Brocas, zyrtarja më e lartë shtetërore në rajonin bregdetar të Gironde, ku ndodhen Grand Crohot dhe Bordo, theksoi se “situata mbetet e ndërlikuar. Ende nuk jemi jashtë rrezikut.”
Zjarri në Gironde ka djegur një sipërfaqe katër herë më të madhe se Parisi dhe ka vënë në provë përpjekjet e zjarrfikësve nga një duzinë shtetesh.
Ndërkohë, në Spanjë, mijëra banorë u lejuan të ktheheshin në shtëpitë e tyre, pasi zjarrfikësit arritën të vinin nën kontroll disa prej zjarreve më të mëdha.
Megjithatë, autoritetet mbeten në gatishmëri për një valë të katërt të të nxehtit këtë verë, me temperatura që pritet të kalojnë 40 gradë Celsius të mërkurën.
Shqetësimi kryesor për zjarrfikësit spanjollë mbetet rreziku që dy zjarre të mëdha në kodrat pyjore në perëndim të Madridit të bashkohen në një vatër të vetme.
Në provincën Avila, në veriperëndim të Madridit, mbi vatrën e zjarrit u vërejt formimi i një reje pirokumulimbusi, një lloj reje stuhie që krijohet nga nxehtësia ekstreme e zjarreve pyjore ose e shpërthimeve vullkanike.
David Gonzalez, një kopshtar 48-vjeçar nga Avila, përshkroi shkatërrimin e shkaktuar nga zjarret duke theksuar: “Ndjejmë shumë zemërim dhe pafuqi. Është diçka çnjerëzore.”
Ekspertët paralajmërojnë se vala e re e të nxehtit mund të përkeqësojë më tej zjarret që vazhdojnë të digjen, siç raporton DW.