**Trump: SHBA-ja nuk autorizoi Ukrainën për prodhimin e raketave Patriot**
Presidenti i Shteteve të Bashkuara, Donald Trump, deklaroi sot se SHBA-ja nuk e ka autorizuar Ukrainën për prodhimin e raketave Patriot. Ai shtoi se vendi i tij duhet të jetë “shumë i kujdesshëm” kur bëhet fjalë për dhënien e lejes dikujt për prodhimin e këtyre armëve.
Gjatë një mbledhjeje të kabinetit, Trump tha: “Ne nuk e kemi dhënë pëlqimin tonë. Jemi duke e diskutuar këtë çështje.”
Më herët, Trump i kishte thënë ‘Financial Times’ se nuk ishte “i sigurt” nëse do t’i jepte “dritën jeshile” Kievit.
Në një takim kabineti të hapur për shtypin në rezidencën verore presidenciale, Camp David, presidenti amerikan përmendi se “Presidenti Volodymyr Zelensky do të dëshironte të kishte raketa Patriot dhe raketa Tomahawk”.
Lidhur me këtë, Trump theksoi: “Këto armë janë të pabesueshme. Duhet të jemi shumë të kujdesshëm përpara se të lejojmë dikë t’i prodhojë ato.” Ai paralajmëroi se, “Ju u jepni atyre këtë teknologji dhe një ditë ata mund t’ju kundërvihen.”
Këto diskutime vijnë pasi, gjatë një vizite në Uashington pak ditë më parë, presidenti ukrainas Zelensky kishte deklaruar se kishte “diskutuar me Trumpin rreth licencave për të prodhuar raketa interceptuese Patriot”. Ky diskutim ishte zhvilluar në një takim të mbyllur në Shtëpinë e Bardhë.
Për Kievin, mbrojtja kundër raketave balistike, të cilat janë veçanërisht të vështira për t’u kapur, është një “prioritet absolut”, sidomos në një kohë kur Rusia po intensifikon sulmet e saj ndaj Ukrainës. Aktualisht, vetëm sistemet amerikane Patriot mund t’i rrëzojnë ato, por Ukraina përballet me mungesë të raketave interceptuese PAC-3.