Lidhja e Shkrimtarëve e Kosovës (LSK) organizon sot një ceremoni përkujtimore për nder të figurës së shquar të letërsisë dhe politikës, Flora Brovina. Aktiviteti mbahet në shenjë nderimi për jetën, veprën dhe kontributin e saj të shumëanshëm.
Gjatë kësaj ore përkujtimore, do të lexohen poezi dhe prozë kushtuar personalitetit të saj, si dhe do të prezantohen krijime letrare nga vetë Brovina.
Flora Brovina ishte një personalitet kompleks dhe me ndikim të madh: ish-kryetare e LSK-së, deputete, mjeke dhe luftëtare e Ushtrisë Çlirimtare të Kosovës. Ajo njihet gjerësisht edhe për angazhimin e saj të thellë politik dhe humanitar.
Me këtë ceremoni, Lidhja e Shkrimtarëve e Kosovës synon të theksojë dhe nderojë kontributin e saj të vyer në letërsi dhe në jetën publike, duke rikujtuar një figurë që la gjurmë të pashlyeshme në fusha të ndryshme të shoqërisë kosovare.
Aktiviteti do të fillojë në orën 12:00, në ambientet e LSK-së, në Prishtinë.