Të paktën një marinar ka humbur jetën dhe tre të tjerë rezultojnë të zhdukur, pasi një anije mallrash u fundos në brigjet rumune të Detit të Zi. Presidenti Nicușor Dan akuzoi Rusinë për përshkallëzimin e sulmeve në krahun lindor të NATO-s.
Një anije mallrash është fundosur në Detin e Zi, pranë brigjeve të Rumanisë, pas një goditjeje me dron, duke shkaktuar viktima dhe të zhdukur mes ekuipazhit. Sipas agjencisë Reuters, presidenti rumun Nicușor Dan e cilësoi incidentin si pjesë të përshkallëzimit të luftës së Rusisë kundër Ukrainës.
Anija “Khoryv”, e cila lundronte nën flamurin e Komoreve, lëshoi sinjalin e emergjencës rreth 13 milje detare larg portit të Konstancës, pak përtej ujërave territoriale rumune, bëri të ditur autoriteti detar i vendit.
Në bord ndodheshin 13 marinarë ukrainas dhe azerë. Nëntë prej tyre u shpëtuan, një person u nxor i vdekur nga deti, ndërsa tre të tjerë rezultojnë ende të zhdukur.
Pamjet e publikuara nga autoritetet rumune tregojnë momentet kur anija përmbyset dhe fundoset, derisa mbi sipërfaqen e detit mbetet e dukshme vetëm një pjesë e vogël e saj.
Ekipet e emergjencës nisën operacionet e kërkim-shpëtimit, pavarësisht kushteve të vështira atmosferike, dallgëve të forta dhe erërave të fuqishme.
Rriten shqetësimet për sigurinë në Detin e Zi
Incidenti vjen në një periudhë tensionesh të shtuara në Detin e Zi, ku janë raportuar sulme ndaj anijeve tregtare pranë brigjeve të Rumanisë dhe Bullgarisë, dy vende anëtare të NATO-s.
Presidenti rumun e paraqiti ngjarjen si një tjetër shenjë të përshkallëzimit të konfliktit dhe të rreziqeve që lufta në Ukrainë paraqet për sigurinë rajonale.
Sulmet ndaj transportit detar në këtë zonë kanë shtuar shqetësimet për sigurinë e rrugëve tregtare dhe për rrezikun e përhapjes së pasojave të luftës përtej territorit ukrainas.
Autoritetet vijojnë të përballen me sfidën e identifikimit të rrethanave të plota të incidentit dhe të gjetjes së marinarëve të zhdukur.