**Jovo Bakiq: Lista Studentore ka kandidat presidencial, por emri nuk bëhet publik**

Jovo Bakiq, kryetar i grupit parlamentar të Listës Studentore në Kuvendin e Serbisë, ka konfirmuar se partia e tij ka një kandidat për zgjedhjet presidenciale të ardhshme, por emri i tij nuk do të bëhet publik për momentin. Ky njoftim vjen pas paralajmërimit të kryetarit të Kuvendit, Aleksandar Çupiq, për shpalljen e zgjedhjeve presidenciale në ditët në vijim.

“Ne kemi një kandidat, por ende nuk do ta bëjmë publik emrin e tij,” tha Bakiq për gazetën Nova, teksa u pyet lidhur me zhvillimet e fundit politike.

Lidhur me pyetjen pse mendon se Partia Përparimtare Serbe (SNS) mund të tërhiqet nga gara presidenciale, Bakiq shprehu bindjen se SNS nuk ka një kandidat të përshtatshëm dhe është e vetëdijshme se kandidati i saj do të performonte shumë më dobët se lista e tyre në zgjedhjet parlamentare.

“Një rezultat i tillë, padyshim, do të ndikonte në përshpejtimin e procesit të dobësimit dhe shpërbërjes së tyre, gjë që, në një mënyrë apo tjetër, herët a vonë, do të ndodhë gjithsesi,” deklaroi Bakiq.

Ai zbuloi gjithashtu se është përgatitur për postin e ministrit të Punëve të Brendshme dhe vazhdon të thellojë njohuritë për këtë detyrë. Megjithatë, Bakiq theksoi se kjo nuk nënkupton domosdoshmërisht emërimin e tij, pasi ka edhe individë të tjerë shumë të aftë për këtë funksion.

“Disa prej tyre, nga afërsia profesionale me këtë sektor, janë madje edhe më të përshtatshëm se unë. Gjithçka varet nga vendimet që do të marrin mandatari dhe kolegët deputetë, në konsultim me studentët. Kjo nuk do të thotë aspak se do të jem unë ministri,” shpjegoi ai.

Në fund, i pyetur drejtpërdrejt nga gazetari nëse kjo do të thotë se nuk do të bëhet ministër i Punëve të Brendshme, Bakiq u përgjigj me pohim: “Pikërisht kështu.”