Kreu i policisë patrulluese të Ukrainës, Yevhen Zhukov, ka dhënë dorëheqjen pas akuzave se dy oficerë të tij braktisën vendin e një përleshjeje fatale me armë zjarri në kryeqytetin Kiev. Lajmi u raportua nga BBC.
Një incident tragjik ndodhi të shtunën, kur gjashtë persona humbën jetën dhe 14 të tjerë u plagosën. Ngjarja nisi pasi një burrë hapi zjarr ndaj njerëzve në rrugë në lagjen jugore Holosiivskyi të Kievit, përpara se të merrte pengje disa persona të tjerë në një supermarket aty pranë. Agresori u vra më vonë gjatë një shkëmbimi zjarri me forcat e rendit.
Pamje filmike, të shpërndara gjerësisht në internet, duket se treguan oficerët duke braktisur civilët dhe duke u larguar nga vendi i ngjarjes.
Ministri i Brendshëm i Ukrainës, Igor Klymenko, deklaroi se oficerët e përfshirë ishin pezulluar nga detyra dhe se një hetim për veprimet e tyre kishte nisur. Në një postim në Telegram, Klymenko theksoi: “Shërbe dhe mbro” nuk është vetëm një slogan. Ai duhet të mbështetet nga veprime të përshtatshme profesionale. Sidomos në momente kritike, kur jeta e njerëzve varet prej saj.” Megjithatë, ministri paralajmëroi se “nuk është plotësisht e saktë të bësh përgjithësime për të gjithë policinë vetëm nga veprimet e dy punonjësve.”
Në një konferencë shtypi të dielën, Zhukov shpjegoi se oficerët “nuk kishin arritur të vlerësonin siç duhet situatën dhe kishin lënë civilët në rrezik.” Ai shtoi se ata kishin vepruar “joprofesionalisht dhe padenjësisht.” Duke deklaruar se ai vetë ishte një “oficer luftarak,” Zhukov konfirmoi: “Kam vendosur të paraqes dorëheqjen time nga pozicioni që mbaj aktualisht.”