**Real Madrid në ankth: Lëndimi i Mbappé rrezikon ndeshjet kyçe**
Kylian Mbappé, ylli i Real Madridit, ka pësuar një lëndim gjatë ndeshjes së luajtur kundër Real Betis të premten mbrëma, e cila përfundoi në barazim 1-1 në stadiumin “La Cartuja”. Ky incident rrezikon praninë e tij në takime vendimtare të ardhshme. Sulmuesi francez kërkoi vetë zëvendësimin, pa u qartësuar menjëherë natyra e dëmtimit.
Incidenti ndodhi rreth minutës së 80-të. Ndërsa Real Madridi ishte në epërsi, Mbappé, pasi asistoi Vinícius Júnior nga krahu i djathtë, u rrëzua në tokë. Ndonëse u ngrit shpejt, ai menjëherë kërkoi zëvendësimin dhe u largua drejt tunelit, pa u kontrolluar nga stafi mjekësor në fushë.
Pas ndeshjes, trajneri i Real Madridit, Álvaro Arbeloa, nuk dha detaje për gjendjen e Mbappé. Ai deklaroi: “Nuk e di, nuk kam ide. Kishte një shqetësim dhe do të shohim si do të zhvillohet situata në ditët në vijim.” Klubi madrilen shpreson që ky dëmtim të mos jetë serioz, duke shmangur një situatë të ngjashme me atë të Arda Güler dhe Éder Militão, të cilët u përjashtuan nga fusha për pjesën e mbetur të sezonit. Kujtojmë se Militão gjithashtu u largua nga ndeshja kundër Alavés si masë paraprake, përpara se të diagnostikohej me një dëmtim të muskulit të kofshës.
Megjithatë, ka shpresa që dëmtimi i Mbappé të jetë më i lehtë. Sipas raportimeve të “Diario AS”, dyshohet për një tendosje muskulore. Nëse ky diagnostikim konfirmohet, ai mund të rikthehet në fushë në kohë për ndeshjen kundër Espanyolit fundjavën e ardhshme dhe për “El Clasico”-n kundër Barcelonës pas dy javësh.