Drejtori sportiv i Milanit, Igli Tare, ka theksuar se “është detyrë” për klubin që ta ketë titullin kampion si objektiv, ndërsa shtoi se është “më e lehtë” të bindësh lojtarë si Luka Modrić t’i bashkohen “Rossonerëve” sesa Lazio.
Ish-sulmuesi kaloi menjëherë në drejtim te Lazio pas përfundimit të karrierës, por pas një viti pushimi, mori rolin te Milani verën e kaluar.
Një nga lojtarët që u tërhoq nga historia e klubit të madh të “San Siros” ishte Modrić, i cili nuk e ka fshehur kurrë se ishte tifoz i Milanit që në fëmijëri.
“E dija që Modrić ishte tifoz i Milanit që i vogël, kështu që kur u takuam dhe folëm për projektin, pashë se ai dinte shumë për klubin. Kishte oferta të tjera, por donte të realizonte ëndrrën e tij për të luajtur te Milani,” tha Tare.
Kroati është jashtë për pjesën e mbetur të sezonit pas një operacioni për një frakturë në mollëz, ndërsa kontrata e tij skadon më 30 qershor dhe e ardhmja mbetet e paqartë.
“Mendoj se ai do të zgjedhë me zemër dhe do të qëndrojë te Milani”, shtoi ai.
Skuadra është në rrugë të mirë për të përfunduar në vendin e tretë dhe për t’u kualifikuar në Ligën e Kampionëve në sezonin e parë nën drejtimin e trajnerit Massimiliano Allegri.
“Kam një raport shumë të mirë me të,” vazhdoi Tare.
“U takuam në fillim të sezonit dhe më pas, pas përfundimit të merkatos, patëm mundësi të kalonim më shumë kohë bashkë. Ai është një person shumë inteligjent që di të menaxhojë situatat në dhomën e zhveshjes. Milani e zgjodhi Allegrin për historinë e tij, lidhjen me klubin, përvojën dhe mbi të gjitha aftësinë për të menaxhuar një klub kaq të madh”, u shpreh ai.
Milani ishte gjithashtu në garë për Serie A, por në fund humbi terren ndaj Interit, pavarësisht se fitoi të dyja ndeshjet e “Derby della Madonnina”.
“Kemi lojtarë të mirë, por ka sezone me vështirësi dhe shumë nga sulmuesit tanë patën lëndime që nuk u lejuan të stërviteshin rregullisht,” shtoi Tare.
“Nuk jam vetëm unë që mendoj për titullin, por i gjithë klubi që dëshiron gjithmonë të jetë konkurrues. Ta kemi Scudetton si objektiv është detyra jonë”, e mbylli shqiptari./GazetaExpress/