Mali i Zi drejt fazës përfundimtare të anëtarësimit në BE
Kandidatura e Malit të Zi për në Bashkimin Evropian i është afruar një hap më shumë vijës së fundit të mërkurën, ndërsa zyrtarët e BE-së kanë nisur punën për hartimin e traktatit të pranimit, i cili do të çojë vendin e Ballkanit Perëndimor drejt anëtarësimit në bllok, shkruan Politico.
Ambasadorët e BE-së miratuan krijimin e një grupi pune ad hoc, i përbërë nga përfaqësues të shteteve anëtare të Bashkimit Evropian, i cili do të mblidhet rregullisht për të detajuar aspektet ligjore të procesit të anëtarësimit të Malit të Zi në BE.
“Ky hap shënon një moment të rëndësishëm në procesin e pranimit të Malit të Zi dhe i dërgon një sinjal të fortë të gjithë partnerëve të zgjerimit se anëtarësimi në BE mbetet një objektiv i arritshëm,” tha një zëdhënës i presidencës qipriote.
Podgorica ka mbyllur përkohësisht 14 nga 33 kapitujt që duhet të përmbushen përpara se të bashkohet me bllokun. Megjithatë, sundimi i ligjit mbetet pengesa më e madhe, ndërsa komisionerja e Zgjerimit, Marta Kos, ka bërë thirrje që Mali i Zi të vijojë reformat.
Ky vend, me rreth 600,000 banorë, fitoi statusin e kandidatit për në BE në vitin 2010, katër vjet pas ndarjes nga Serbia, dhe nisi bisedimet e anëtarësimit në vitin 2012. Qëllimi i tij është të bëhet anëtar deri në vitin 2028, ambicie e shprehur edhe me sloganin ’28 nga 28′ në linjën ajrore kombëtare.
Komisioni kishte synuar ta përdorte Malin e Zi si një rast pilot për planet e tij, të orientuara drejt parandalimit të një “Hungarie 2.0” – një propozim për pranim gradual me dy nivele, i dizajnuar për të frenuar regresin demokratik pas anëtarësimit. Megjithatë, ky propozim është kundërshtuar nga disa shtete anëtare të BE-së kohët e fundit.
Në një zhvillim të lidhur, Sekretari i Përgjithshëm i NATO-s, Mark Rutte, takoi gjithashtu Presidentin e Malit të Zi, Jakov Milatoviç, të mërkurën, gjatë një vizite në vend.
Milatoviç shkroi në platformën X se ata kishin diskutuar “faktorët kryesorë mbi të cilët duhet të punojmë si vend në fazën përfundimtare të negociatave me Bashkimin Evropian”, duke përfshirë stabilitetin rajonal dhe anëtarësimin e besueshëm në NATO.