Arrestohet një shtetase e huaj në Prishtinë, e dyshuar se ka hedhur gurë në drejtim të një banese tjetër, duke plagosur një person dhe duke thyer derën për të hyrë brenda. Ngjarja ndodhi në orët e para të mëngjesit të datës 3 tetor 2026.
Policia e Kosovës njoftoi se ka arrestuar një shtetase të huaj, e cila dyshohet se nga ballkoni i banesës ku ndodhej, ka hedhur gurë drejt ballkonit të një viktime, po ashtu shtetas i huaj. Si pasojë e kësaj, viktima pësoi lëndime në këmbë.
Sipas policisë, e dyshuara kishte qenë agresive dhe, me anë të një thike, kishte thyer xhamin e derës së tarracës, duke hyrë me forcë brenda banesës së viktimës. Kjo sjellje paraqiste rrezik për njësitë policore që ndërhynin në vendngjarje.
Me urdhër të prokurorit, njësia përkatëse policore hapi me forcë derën e banesës ku ndodhej e dyshuara. Nga ajo u konfiskua thika e përdorur.
E dyshuara u shoqërua në stacionin policor dhe, pas intervistimit, me vendim të prokurorit, u dërgua në qendrën e mbajtjes. Ajo po hetohet për veprat penale “Lëndim i lehtë trupor” dhe “Asgjësim apo dëmtim i pasurisë”.