Barcelona shqyrtoi mundësinë e transferimit të Harry Kane si zëvendësues afatgjatë të Robert Lewandowski, por interesi i klubit katalanas ka marrë fund shumë shpejt.
Kapiteni i Anglisë e ka bërë të qartë se dëshiron të vazhdojë karrierën te Bayern Munichu, duke e detyruar Barcelonën të përqendrohet te objektiva të tjerë në repartin ofensiv.
Barcelona e konsideronte Kane si pasardhësin ideal të Lewandowskit, ndërsa vazhdon të planifikojë të ardhmen e sulmit.
Edhe pse sulmuesi i Atlético Madrid, Julián Álvarez, mbetet objektivi kryesor, Kane shihej si një alternativë shumë tërheqëse falë instinktit të tij për gol dhe përvojës së madhe.
Sipas “CFBayern Insider”, klubi katalanas kontaktoi përfaqësuesit e kapitenit të Anglisë për të mësuar nëse një transferim në La Liga ishte i mundur.
Megjithatë, përgjigjja ishte e qartë: Kane nuk ka asnjë interes të largohet nga Bayern Munichu, duke i dhënë fund shpresave të Barcelonës para se negociatat të merrnin formë.
Gazetari i “Bild”, Christian Falk, konfirmoi se Barcelona kishte kontaktuar kampin e Kane, por theksoi se prioriteti i sulmuesit është të qëndrojë në Gjermani.
“Është e vërtetë. Përfaqësuesit e Harry Kane janë kontaktuar nga Barcelona. Kjo më është konfirmuar. Por kam dëgjuar gjithashtu se Barcelona nuk ka asnjë shans ta rrëmbejë Kane nga Bayern Munichu. Ai dëshiron të qëndrojë në Mynih dhe të nënshkruajë një kontratë të re. Megjithatë, nuk dëshiron ta bëjë këtë tani për tani, pasi është ende i angazhuar me kombëtaren angleze në Botëror. Sidoqoftë, Kane dëshiron të negociojë vetëm me Bayern Munich dhe mendoj se do të gjejnë një zgjidhje”, tha ai.
Bayern ka çdo arsye për ta mbajtur Kane në “Allianz Arena” pas një tjetër sezoni të jashtëzakonshëm.
Sulmuesi shënoi 61 gola dhe regjistroi shtatë asistime në të gjitha garat gjatë sezonit 2025/26, ndërsa në shumë raste kontribuoi edhe si organizator i lojës.
Kane ka realizuar tashmë 146 gola me fanellën e Bayern Munichut dhe ka kontratë deri në qershor të vitit 2027.
Drejtuesit e klubit janë të bindur se ai mund të vazhdojë të udhëheqë repartin ofensiv edhe për shumë vite dhe planifikojnë të nisin bisedimet për rinovimin e kontratës sapo të përfundojnë angazhimet e tij me kombëtaren angleze në Botëror./GazetaExpress/