**Botërori 2026: Një turne historik, por i papërballueshëm – Finalja arrin 11,000 dollarë**
Kampionati Botëror i futbollit, “Botërori 2026”, parashikohet të jetë një ngjarje historike, me pjesëmarrjen e 48 skuadrave kombëtare dhe zhvillimin e mbi 100 ndeshjeve. Ky event madhor do të organizohet në tre vende pritëse: Shtetet e Bashkuara të Amerikës, Kanadaja dhe Meksika.
Megjithatë, përtej spektaklit sportiv në fushë, vëmendja kryesore po përqendrohet te çmimet e biletave, të cilat kanë arritur nivele rekord.
Sipas informacioneve të qarkulluara, për të siguruar një vend në ndeshjen finale, tifozët duhet të përballojnë kosto që variojnë nga 4.000 dollarë për kategoritë më të lira, deri në 10.800 – 11.000 dollarë për vendet më ekskluzive, siç përcjell “Gazeta Express”.
Edhe për fazat e tjera të turneut, çmimet mbeten jashtëzakonisht të larta: për gjysmëfinalet ato shkojnë nga 2.500 deri në 6.000 dollarë, ndërsa për çerekfinalet nga 1.500 deri në 3.500 dollarë.
Lidhur me fazën e grupeve, gjenden bileta me çmime fillestare nga 60 – 70 dollarë, por bëhet fjalë për një numër tepër të kufizuar. Në realitet, pjesa më e madhe e biletave tregtohet me çmime që sillen nga 150 deri në 500 dollarë.
Një rol thelbësor në këtë rritje çmimesh luan sistemi i “çmimeve dinamike” (dynamic pricing), i cili lejon ndryshimin e vazhdueshëm të kostos në varësi të kërkesës. Në disa raste, rritja mund të arrijë deri në 200% – 300%, duke i bërë biletat edhe më pak të përballueshme për publikun e gjerë.
Kjo situatë ka shkaktuar reagime të shumta nga organizatat e mbrojtjes së konsumatorëve, të cilat kanë shprehur shqetësime lidhur me mungesën e transparencës dhe zbatimin e politikave të padrejta të çmimeve.
Megjithëse interesi për turneun mbetet jashtëzakonisht i lartë, me miliona tifozë që synojnë të ndjekin nga afër një nga Kampionatet Botërore më të mëdha në histori, me këto çmime, prania në stadium rrezikon të mbetet thjesht një ëndërr për shumë prej tyre. /Gazeta Express