Etiketa Sociale: Sjellje Që Duhen Shmangur
Kur ndalojmë për të biseduar me dikë në rrugë, nuk duhet të mbështetemi pas murit; mund të qëndrojmë thjesht në këmbë. Po ashtu, mbajtja e duarve në xhepa nuk konsiderohet elegante.
Një ves i pakëndshëm i disa personave është trokitja ritmike mbi tryezë me laps, çakmak apo objekte të tjera, ndërkohë që ata dëgjojnë muzikë në mendjen e tyre. Kjo shpesh pa vetëdije bezdis ose acaron të tjerët rreth e rrotull.
Madje edhe gjatë një diskutimi të ndezur, nuk duhet kurrë të prekim ndonjë kopsë të bashkëbiseduesit, ta kapim për kravate, t’i rrahim fort shpatullat apo ta shpojmë në brinjë me bërryl.
Kur jemi në shoqëri, është e papranueshme t’u kthejmë kurrizin personave pranë nesh. Në rast se kjo bëhet e nevojshme për shkak të një rrethane të caktuar (për shembull, për t’iu përgjigjur një pyetjeje), atëherë duhet të kërkojmë ndjesë paraprakisht.