**Ngarkesë e madhe në kufirin Kroaci-Mal i Zi, Shqipëria angazhohet për lehtësimin e kalimit të mërgimtarëve**
Pritje të gjata, që në disa raste kanë zgjatur deri në 15 orë, janë shkaktuar nga fluksi i madh i automjeteve në pikat kufitare mes Kroacisë dhe Malit të Zi. Kjo situatë ka prekur qindra mërgimtarë që udhëtojnë drejt Kosovës dhe vendeve të tjera të rajonit. Përballë kësaj problematike, Ministria për Evropën dhe Punët e Jashtme e Shqipërisë ka njoftuar se po ndjek nga afër situatën dhe është angazhuar për të lehtësuar kalimin e tyre.
Ministria bën me dije se institucionet shqiptare janë në kontakt të vazhdueshëm me autoritetet përkatëse të Kroacisë dhe Malit të Zi. Qëllimi është përshpejtimi i procedurave të kontrollit kufitar dhe reduktimi i pritjeve të gjata, veçanërisht gjatë sezonit veror kur fluksi është më i lartë.
Ndërkohë, shumë mërgimtarë kanë raportuar për kolona automjetesh disa kilometra të gjata dhe mungesë të kushteve bazë gjatë pritjes. Ata i kanë bërë thirrje institucioneve të ndërhyjnë për normalizimin sa më të shpejtë të qarkullimit.
Autoritetet u bëjnë thirrje qytetarëve që të informohen paraprakisht për gjendjen në pikat kufitare dhe, kur është e mundur, të shfrytëzojnë pika alternative kalimi për të shmangur pritjet e gjata.