FSHF zgjeron impiantin fotovoltaik në “Air Albania”, synon më shumë energji të pastër
Federata Shqiptare e Futbollit (FSHF) po vazhdon investimet në energjinë e rinovueshme. Komiteti Ekzekutiv i FSHF-së ka miratuar zgjerimin e sistemit fotovoltaik në stadiumin “Air Albania”. Ky vendim synon rritjen e prodhimit të energjisë së pastër dhe uljen e ndikimit në mjedis.
Sipas njoftimit të federatës, impiantet fotovoltaike në stadiumin “Air Albania” dhe në “Shtëpinë e Futbollit” kanë parandaluar deri tani emetimin e 1,124.6 tonëve dioksid karboni (CO₂). Ky kursim është i barabartë me kontributin mjedisor të mbjelljes së 61,405 pemëve.
Me këtë investim, FSHF thekson angazhimin e saj për një futboll më të qëndrueshëm dhe një të ardhme më miqësore me mjedisin.