Kryetari i Aleancës, Ardian Gjini, ka deklaruar se Kosova po përballet me një kolaps të rëndë energjetik, duke theksuar se vetëm gjatë muajit shtator, importi i energjisë elektrike ka shkaktuar shpenzime prej rreth 27 milionë eurosh. Gjini paralajmëroi se vendi mund të detyrohet të importojë energji elektrike në vlerë prej së paku dy milionë eurosh në ditë, ndërsa akuzoi Qeverinë për dështim në riparimin e bojlerit të njërit prej blloqeve prodhuese.
Në një konferencë shtypi, Gjini theksoi se kostot e larta të importit të energjisë elektrike rëndojnë drejtpërdrejt mbi xhepat e qytetarëve, qoftë përmes rritjes së faturave, qoftë përmes shpenzimeve nga buxheti i shtetit. Për këtë arsye, ai njoftoi se Aleanca do të kërkojë një interpelancë në Kuvendin e Kosovës javën e ardhshme.
Gjini e cilësoi situatën aktuale si një “kolaps”, duke argumentuar se importi i “brutal” i energjisë me çmime të larta po dëmton rëndë ekonominë dhe jetën e përditshme të qytetarëve. Ai theksoi se pagesat për energjinë, qoftë përmes faturave direkte apo taksave shtetërore, dalin nga xhepat e qytetarëve.
Gjini prezantoi edhe shifra konkrete, duke bërë të ditur se në momentin e deklaratës, prodhimi vendor i energjisë ishte rreth 372 megavat, ndërsa kërkesa e tejkalonte 800 megavatët. Ai përsëriti shifrën e 27 milionë eurove për importin e energjisë vetëm gjatë shtatorit dhe theksoi se, pavarësisht se kërkesa aktuale konsiderohet e ulët, Kosova rrezikon të shpenzojë deri në dy milionë euro në ditë për importe.
Më tej, Gjini akuzoi Qeverinë se ka dështuar me qëllim në tenderin për riparimin e bojlerit të njërit prej blloqeve, duke pretenduar se procedura ishte mbyllur pa fitues. Kjo praktikë, sipas tij, ka shërbyer për zbulimin e çmimeve të ofertave, duke e cilësuar si një “aferë korruptive brutale”. Ai kujtoi se ishte i njëjti bojler për të cilin kryeministri Albin Kurti kishte folur vite më parë. Gjini paralajmëroi se ky mosriparim do të detyrojë nxjerrjen e bllokut më të madh prodhues nga sistemi sërish gjatë muajve dhjetor, janar ose shkurt. Për të gjitha këto arsye, Aleanca do të kërkojë interpelancë në Kuvend.