Gjysma e parë e korrikut ka shënuar rekorde historike temperaturash në Zvicër, me mesatare 4.4 gradë Celsius mbi normën dhe një thatësirë të theksuar. Në rajonin e Ticinos u regjistruan vlera kulmore, si 37.4 gradë Celsius në Locarno-Monti.
Sipas të dhënave të MeteoNews, gjysma e parë e korrikut është karakterizuar nga temperatura të jashtëzakonshme dhe mungesë e madhe reshjesh në Zvicër. Temperaturat në mbarë vendin ishin mesatarisht 4.4 gradë Celsius më të larta se mesatarja e periudhës 1991–2020, duke tejkaluar edhe rekordin e mëparshëm të regjistruar në korrik të vitit 2015.
Devijimet më të mëdha u vunë re në rajonin e Liqenit të Gjenevës, përgjatë Jurës dhe në veriperëndim të Zvicrës, ku termometri shënoi mesatarisht 4.5 deri në 5.5 gradë mbi normën shumëvjeçare. Në majën Dôle, në lartësi 1,678 metra, diferenca arriti deri në gjashtë gradë.
Rajoni i Ticinos regjistroi rekorde të veçanta. Më 8 korrik, në Locarno-Monti u matën 37.4 gradë Celsius, temperatura më e lartë e regjistruar ndonjëherë gjatë muajit korrik që nga fillimi i matjeve në vitin 1935. Një ditë më pas, 37.3 gradë Celsius në Pianura di Magadino përbënin një rekord absolut që nga viti 1953.
Numri i ditëve me temperatura mbi 30 gradë Celsius ishte gjithashtu jashtëzakonisht i lartë. Lugano dhe Locarno shënuan nga 13 ditë të nxehta, krahasuar me mesataren e korrikut prej pesë deri në shtatë ditë. Situata ishte e ngjashme edhe në qytete të tjera si Bazel, Gjenevë, Bernë dhe Cyrih.
Përveç valës së të nxehtit, vendi u përball edhe me një thatësirë të theksuar. Gjatë dy javëve të para të korrikut, reshjet në Zvicër ishin 65% më të ulëta se mesatarja shumëvjeçare, ndërsa disa stacione nuk regjistruan fare shi. Kohëzgjatja e rrezeve të diellit ishte 30 deri në 60% mbi normën në shumë zona.
MeteoSwiss thekson se ky ishte fillimi i verës me numrin më të ulët të rrufeve që nga viti 2015, pasi stuhitë ishin të rralla pavarësisht temperaturave ekstreme.