Partia Demokratike e Kosovës (PDK), përmes kryetarit të saj Bedri Hamza, ka paralajmëruar nga foltorja e Kuvendit të Kosovës hyrjen në një fazë të re të veprimit politik, institucional dhe juridik. Hamza theksoi se PDK-ja nuk do të pranojë vazhdimin e shkeljeve kushtetuese dhe do të veprojë për rikthimin e ligjshmërisë dhe rendit kushtetues në vend.
Në fjalën e tij, Hamza theksoi se për javë të tëra, deputetët e PDK-së kanë kërkuar vazhdimin e seancës konstituive dhe respektimin e Kushtetutës, vendimeve të Gjykatës Kushtetuese dhe Rregullores së Kuvendit. Ai shtoi se kërkohej “ajo që nuk do të duhej të kërkohej fare në një shtet demokratik,” që deputetët të mund të ushtronin mandatin e tyre.
Hamza theksoi se situata aktuale nuk përbën një përplasje të thjeshtë politike apo konflikt mes partive dhe individëve. “Është konflikt mes një mënyre autoritare të ushtrimit të pushtetit dhe rendit kushtetues të Republikës së Kosovës,” u shpreh ai, duke shtuar se pushteti nuk mund t’i trajtojë Kushtetutën dhe vendimet gjyqësore sipas interesit politik.
Duke ilustruar pikën e tij, ai deklaroi: “Në demokraci, edhe kur nuk të pëlqen Kushtetuta, nuk e shkel atë. Kur nuk të pëlqen një vendim i Gjykatës Kushtetuese, nuk sillesh sikur ai nuk ekziston. Dhe kur Gjykata Supreme konstaton se deputeti nuk mund ta ushtrojë njëkohësisht funksionin e ministrit, nuk mund të sillesh sikur gjykata nuk ka folur.”
Ai kritikoi edhe thirrjen e seancës konstituive për datën 9 shtator, duke theksuar se tashmë shkelet afati prej 30 ditësh, i përcaktuar madje nga vetë Lëvizja Vetëvendosje. “Kuvendi i Kosovës nuk mund të presë derisa një parti t’i përfundojë kalkulimet e veta. Kuvendi është institucion i Republikës,” shtoi ai.
Hamza vuri në dukje se institucionet e Republikës nuk mund të mbahen peng i interesit të një partie apo individi. “Këto institucione nuk janë krijuar për një parti. Janë ndërtuar për një shtet… Kosova ka paguar çmim tepër të lartë për institucionet e saj që sot dikush t’i trajtojë ato si peng të interesit të vet politik,” deklaroi ai.
Kryetari i PDK-së e bëri të qartë se partia e tij nuk do të pranojë “normalizimin” e shkeljeve kushtetuese. “Nuk do të pranojmë që shkelja e Kushtetutës të bëhet praktikë. Nuk do të pranojmë që vendimet e gjykatave të shndërrohen në çështje të vullnetit politik,” nënvizoi ai. Kjo çështje, sipas Hamzës, tejkalon raportin mes opozitës dhe pushtetit. “Këtu bëhet fjalë për Republikën, për rendin kushtetues, për ndarjen e pushteteve, për autoritetin e gjykatave dhe për parimin më elementar të demokracisë: pushteti kufizohet nga ligji. Askush nuk është mbi të,” tha ai.
Hamza paralajmëroi se durimi institucional i PDK-së nuk duhet interpretuar si pranim i paligjshmërisë. “Prandaj, nga sot, Partia Demokratike e Kosovës do ta rimendojë mënyrën e veprimit të saj,” deklaroi ai, duke shtuar se partia do të shqyrtojë forma të tjera politike, institucionale dhe juridike për kthimin e vendit në ligjshmëri.
Në përfundim, Hamza theksoi se beteja aktuale nuk është për pushtet, por për kufijtë e tij dhe respektimin e rendit kushtetues. “Në pyetje është se si qeveriset: sipas Kushtetutës, apo sipas vullnetit të një njeriu?” tha ai. Ai paralajmëroi se “nga sot fillon një fazë tjetër” ku PDK-ja nuk do të mjaftohet vetëm duke kërkuar respektimin e ligjshmërisë, por do të veprojë me përgjegjësi, vendosmëri dhe me të gjitha mjetet demokratike dhe institucionale për rikthimin e saj.