Aktori hollivudian, Hugh Jackman, duket se po ndjek shembullin e mikut dhe kolegut të tij Ryan Reynolds, duke shprehur interesin për të investuar në një klub futbolli në Angli. Ylli australian ka zbuluar dëshirën e tij për të blerë një pjesë të aksioneve të Norwich City, skuadrës që garon në Championship, liga e dytë e futbollit anglez.
Jackman është prej kohësh një tifoz i zjarrtë i Norwich City, pasi qyteti është vendlindja e nënës së tij në Anglinë Lindore. I pyetur gjatë një interviste nëse do të dëshironte të “blejë një pjesë” të klubit, aktori dha një përgjigje që ngjalli menjëherë interes dhe konfirmoi lajmin ekskluziv:
“Jam shumë i interesuar të flas për këtë tani. Ju jeni i pari që e dini. Ka diçka të vogël ekskluzive.”
Norwich City aktualisht është në pronësi, në pjesën më të madhe, të investitorit amerikan Mark Attanasio, i cili është gjithashtu pronar kryesor i skuadrës së bejsbollit Milwaukee Brewers.
Nëse investimi realizohet, Jackman do t’i bashkohej një liste gjithnjë e më të gjatë të yjeve të Hollywoodit që janë përfshirë në botën e futbollit anglez. Miku i tij Ryan Reynolds, së bashku me Rob McElhenney, bleu klubin Wrexham në vitin 2021 dhe e shndërroi atë në një fenomen global të futbollit dhe kulturës pop.
Wrexham dhe Norwich janë aktualisht rivalë në Championship, dhe Jackman e bëri të qartë se, pavarësisht suksesit të Reynolds, zemra e tij i përket klubit nga Norfolk. “Bravo Ryan, po bën punën tënde, unë jam për Kanarinat,” tha ai, duke iu referuar nofkës së Norwich-it, e lidhur me ngjyrat karakteristike të verdha dhe jeshile të ekipit.
Norwich ka një histori të pasur në futbollin anglez dhe luajti për herë të fundit në Premier League katër vite më parë. Një nga momentet më të famshme të klubit erdhi në vitin 1993, kur Norwich mposhti Bayern Munich në Kupën UEFA. Tashmë, Norwich dhe Wrexham pritet të jenë ndër skuadrat që synojnë ngjitjen në Premier League këtë sezon.
Jackman u shpreh optimist për të ardhmen e klubit: “Mendoj se është një ekip emocionues dhe do të jetë një vit emocionues.” Aktori vlerësoi gjithashtu ndryshimet pozitive në klub që pas emërimit të trajnerit belg Philippe Clement në nëntor të vitit të kaluar.
Nëse marrëveshja realizohet, Jackman do të sillte jo vetëm investimin e tij financiar, por edhe një dozë të konsiderueshme të vëmendjes së Hollywoodit te “Kanarinat” e Norwich-it.