Irani akuzon SHBA-në për shkelje armëpushimi pas sulmit ajror
Garda Revolucionare Islamike e Iranit ka akuzuar Shtetet e Bashkuara për shkeljen e marrëveshjes së armëpushimit, duke pretenduar se forcat amerikane kryen një sulm ajror në bregdetin iranian.
Në një deklaratë, Garda Revolucionare pohoi se SHBA-ja e kishte ndërmarrë sulmin “me pretekste të ndryshme”, duke pretenduar se një anije kishte shkelur një rrugë të paautorizuar në Ngushticën e Hormuzit.
Sipas saj, marina iraniane iu përgjigj sulmit duke goditur pozicione ushtarake amerikane në rajon, megjithatë nuk u dhanë detaje të mëtejshme për objektivat apo pasojat e këtij veprimi.
Ebrahim Azizi, kreu i Komisionit të Sigurisë Kombëtare në Parlamentin iranian, deklaroi se sulmet amerikane dëshmojnë mosangazhimin e Presidentit Donald Trump ndaj parimeve të negociatave apo të një armëpushimi.
“Kjo shkelje e pamatur e armëpushimit, si gjithmonë, do të çojë në tërheqje dhe keqardhje nga ana e tyre. Akuzat e ndërsjella nuk po funksionojnë më”, shkroi Azizi në rrjetet sociale.
Të premten, ushtria amerikane kreu sulme ndaj objektivave iraniane, pasi Presidenti Donald Trump akuzoi Iranin për “shkelje të pamatur” të armëpushimit, pas një sulmi ndaj një anijeje tregtare në Ngushticën e Hormuzit.
Më herët, Uashingtoni dhe Teherani kishin arritur një marrëveshje armëpushimi të përkohshëm, me synim garantimin e sigurisë së transportit detar në Ngushticën e Hormuzit. Megjithatë, të dyja palët kanë shkëmbyer akuza lidhur me kontrollin e kësaj rruge ujore strategjike.
Sipas memorandumit të mirëkuptimit, SHBA-ja do të hiqte bllokadën detare ndaj Iranit, ndërsa Teherani do të rihapte Ngushticën e Hormuzit dhe do të rikonfirmonte moszhvillimin apo mosfurnizimin me armë bërthamore. Dokumenti parashikon gjithashtu një afat prej 60 ditësh për arritjen e një marrëveshjeje përfundimtare.