Studim i ri shpjegon lodhjen e prindërve: Fëmijët trevjeçarë, deri në 30 mijë hapa në ditë
Prindërit shpesh habiten me energjinë e pashtershme të fëmijëve të vegjël. Një studim i ri ndërkombëtar ofron tashmë një shpjegim shkencor për këtë fenomen: fëmijët tre dhe katër vjeç mund të bëjnë deri në 30 mijë hapa në ditë.
Ky studim ndërkombëtar, i cili përfshiu 3,570 fëmijë nga 44 vende, po ndjeket mes viteve 2018 dhe 2025. Studiuesit nga Universiteti i Seviljes konstatuan se nivelet e aktivitetit fizik ndryshonin ndjeshëm nga një fëmijë te tjetri, megjithatë djemtë ishin përgjithësisht më aktivë se vajzat.
Numri total i hapave të regjistruar në ditë shkonte nga vetëm 1,124 për fëmijën më pak aktiv, deri në 29,320 hapa për atë më aktiv. Për të mbledhur këto të dhëna, fëmijët mbajtën një matës hapash të vendosur në ije gjatë 24 orëve, për të paktën tri ditë radhazi. Për fëmijët trevjeçarë, djemtë bënin mesatarisht rreth 18,064 hapa në ditë, ndërsa vajzat rreth 16,426 hapa.
Përveç gjinisë, studiuesit identifikuan edhe faktorë të tjerë që ndikojnë në nivelin e aktivitetit fizik. Ata vunë re se fëmijët që jetonin në vende me të ardhura të ulëta ose mesatare, si dhe ata në zona rurale, bënin mesatarisht më shumë hapa sesa fëmijët në vendet me të ardhura të larta ose në zonat urbane.
Sipas autorëve, këto të dhëna mund të përdoren në të ardhmen ngjashëm me grafikët pediatrikë të rritjes, duke u ofruar mjekëve mundësinë të krahasojnë nivelin e aktivitetit të një fëmije me një standard ndërkombëtar. Në studimin e tyre, të publikuar në revistën shkencore “The Lancet Child & Adolescent Health”, studiuesit theksojnë se vendosja e vlerave referuese ndërkombëtare për numrin e hapave ditorë mund të shërbejë si një mjet i rëndësishëm për monitorimin e aktivitetit fizik në fëmijërinë e hershme.
Autorët shpjegojnë se “fëmijëria e hershme është një periudhë kritike për rritjen dhe zhvillimin, ndërsa aktiviteti i ulët fizik në këtë fazë është lidhur me shtim të tepërt në peshë dhe zhvillim më të ngadalshëm motorik”. Ata theksojnë gjithashtu se aktualisht ekzistojnë pak metoda objektive për të matur aktivitetin fizik te fëmijët shumë të vegjël dhe për të identifikuar ata që mund të jenë më pak aktivë se normalja. Numërimi i hapave, sipas studiuesve, mund të ofrojë një metodë praktike, të thjeshtë dhe relativisht të lirë për të monitoruar lëvizjen e fëmijëve në vende dhe sisteme shëndetësore të ndryshme.
Gjetjet sugjerojnë se prindërit që ndihen vazhdimisht të lodhur duke ndjekur të vegjlit e tyre, tashmë kanë një shpjegim të thjeshtë shkencor: fëmijët e kësaj moshe janë pothuajse vazhdimisht në lëvizje.