Juventusi dhe Barcelona, në garë për shërbimet e Bernardo Silvës
Juventusi dhe Barcelona janë në një garë të fortë për të siguruar shërbimet e mesfushorit portugez, Bernardo Silva, gjatë afatit të ardhshëm të transferimeve. Sipas raportimeve të “Tuttosport”, Juventusi ka paraqitur një projekt konkret për lojtarin, duke e bërë klubin e vetëm në Serie A që ka bërë një lëvizje të tillë. Megjithatë, rivali kryesor i “bardhezinjve” mbetet gjiganti spanjoll, Barcelona.
Klubi italian po bën presion të fortë për transferimin e mesfushorit të Manchester Cityt. Burime pranë “Tuttosport” bëjnë me dije se drejtuesit e Juventusit zhvillojnë bisedime të rregullta javore me agjentin e 29-vjeçarit, Jorge Mendes.
Bernardo Silva është një objektiv i rëndësishëm në tregun e transferimeve, me klubet e interesuara që kërkojnë të sigurojnë firmën e tij. Edhe pse raportohet se lojtari është i joshur nga mundësia për t’iu bashkuar Juventusit, ai ka kërkuar kohë për të vlerësuar të gjitha opsionet.
Pavarësisht ofertës bindëse nga Juventusi, Barcelona mbetet një sfidë serioze për “Zonjën e Vjetër”. Raportet sugjerojnë se Bernardo Silva është i mahnitur nga katalanasit dhe projekti i tyre sportiv.
Nga ana financiare, Juventusi thuhet se është i gatshëm të bëjë një përjashtim, duke i ofruar Bernardos një pagë vjetore prej mbi 7 milionë eurosh. Kjo shifër do ta bënte atë një nga lojtarët më të paguar në “Allianz Stadium”, përkrah talentit Kenan Yıldız, paga e të cilit pritet të rritet ndjeshëm sezonin e ardhshëm. Megjithatë, Bernardo Silva aktualisht fiton rreth 10 milionë euro në sezon te Manchester City dhe, sipas raportit, nuk do të shqyrtojë oferta nën 8-9 milionë euro në vit.