Fqinja rrëfen dhunën e përhershme në familjen e 5-vjeçarit të keqtrajtuar në Lipjan
Një fqinje e familjes së 5-vjeçarit nga komuna e Lipjanit, i cili dyshohet se u keqtrajtua rëndë nga prindërit, ka rrëfyer se A.K. dhe V.P. kishin ushtruar dhunë fizike të vazhdueshme ndaj shtatë fëmijëve të tyre. Ajo thekson se familja ishte e njohur për institucionet ligjzbatuese për shkak të problemeve të shumta të regjistruara.
Fqinja, banore e fshatit Janjevë të Lipjanit, dëshmon se prej më shumë se dhjetë vjetësh kjo familje ka shfaqur sjellje problematike. Në lidhje me 5-vjeçarin, ajo shton se nuk e kishte parë asnjëherë të ecte vetë, pasi prindërit e mbanin gjithmonë në krahë, madje edhe kur shkonin në dyqan.
Ajo rrëfen se britmat e fëmijëve dëgjoheshin shpesh, pasi prindërit i rrihnin ata, duke vazhduar shpeshherë deri në mesnatë. Fqinja shpreh keqardhje të thellë për fëmijët, duke theksuar se ata ishin të pafajshëm, ndërsa vlerëson se asnjëri prej prindërve nuk ishte në gjendje të mirë. Pavarësisht dëshmisë së dhunës, ajo tregon se banorët nuk kishin guxuar të njoftonin organet e rendit nga frika e pasojave, duke i cilësuar prindërit si “të rrezikshëm”.
Sipas saj, punonjësit socialë të Qendrës për Punë Sociale në Lipjan e kishin vizituar shpesh familjen. Madje, shton se çdo dy javë, nënën e fëmijëve e vizitonin edhe psikiatër, të cilët i ofronin terapi dhe medikamente të nevojshme. Fqinja, e cila vetë e cilëson veten si “rast social”, konfirmon se i kishte parë këto vizita të shpeshta.
Ajo thekson se për ngjarjen e fundit ishte njoftuar vetëm pas mbërritjes së njësive policore në vendngjarje, edhe pse ishin të vetëdijshëm për historikun e problemeve dhe dhunës së vazhdueshme në familje.
5-vjeçari nga Lipjani, pas keqtrajtimit, po trajtohet në Kujdesin Intensiv Pediatrik të Qendrës Klinike Universitare të Kosovës (QKUK) dhe i është nënshtruar një ndërhyrjeje kirurgjike në shputat e këmbëve. Nga QKUK-ja u njoftua se gjendja e tij shëndetësore është stabile.
Ndërkohë, me kërkesë të Prokurorisë, Gjykata Themelore e Prishtinës ka caktuar masën e paraburgimit prej 30 ditësh për dy prindërit, të cilët dyshohen për veprat penale “Shkelje e detyrimit familjar” dhe “Lëndim i rëndë trupor”.
Qendra për Punë Sociale në Lipjan ka bërë të ditur se gjashtë fëmijët e tjerë të kësaj familjeje tashmë janë nën kujdestarinë e shtetit.