**Konjufca: Deklaratat dhe veprimet e Serbisë sfidojnë sovranitetin e Kosovës, dëshmojnë ambicie territoriale**
**Prishtinë** – Ministri i Punëve të Jashtme dhe Diasporës, Glauk Konjufca, ka reaguar ashpër ndaj deklaratave të fundit të zyrtarëve serbë për Kosovën, si dhe ndaj paraqitjes publike të Milan Radoiçiqit, duke theksuar se këto veprime dëshmojnë vazhdimësinë e ambicieve territoriale të Beogradit ndaj Republikës së Kosovës dhe sfidojnë hapur sovranitetin e saj.
Nëpërmjet një postimi në platformat sociale, Konjufca përmendi deklaratën e zëvendëskryeministrit serb, Ivica Daçiq, i cili gjatë një tubimi zgjedhor në Serbi kishte thënë se flamuri serb “herët a vonë do të valëvitet mbi Prizren”, një qytet në jug të Kosovës. Kjo retorikë, sipas Konjufcës, vërteton se ambiciet territoriale të Serbisë ndaj Kosovës nuk janë një çështje e së kaluarës.
Po ashtu, ai theksoi shfaqjen publike të Milan Radoiçiqit, i cili kërkohet nga Interpoli për organizimin e sulmit terrorist në Banjskë. Radoiçiqi u shfaq përkrah Danilo Vuçiqit, djalit të presidentit serb, Aleksandar Vuçiq, në tubimin e partisë së këtij të fundit në Kragujevc.
Konjufca theksoi se këto nuk janë provokime të izoluara. Ato, sipas tij, nxjerrin në pah vazhdimësinë e një doktrine të rrezikshme politike: ekspansionizmin territorial në retorikë dhe pandëshkueshmërinë për agresion të armatosur në praktikë.
“Serbia nuk mund të pretendojë se synon paqen dhe integrimin evropian, ndërkohë që zyrtarët e saj të lartë sfidojnë hapur sovranitetin e Republikës së Kosovës dhe organizatori i pranuar i sulmit vdekjeprurës terrorist në Banjskë mbetet i lirë, duke u shfaqur publikisht krah familjes së presidentit në vend që të përballet me drejtësinë,” shkroi Konjufca.
Ai i bëri thirrje komunitetit ndërkombëtar që t’i dënojë pa mëdyshje këto veprime dhe të kërkojë llogaridhënie. Konjufca ritheksoi se sovraniteti i Republikës së Kosovës nuk është i negociueshëm, dhe po ashtu as drejtësia për sulmin terrorist në Banjskë.