**Latifi: Buxhetit të Rahovecit i janë tërhequr 4.5 milionë euro përmes përmbarimit vetëm këtë vit**
Kryetari i Komunës së Rahovecit, Smajl Latifi, ka bërë të ditur se kontrata kolektive po shkakton dëme të mëdha financiare për komunën. Ai theksoi se vetëm gjatë këtij viti, 4 milionë e 540 mijë euro janë tërhequr nga buxheti komunal përmes procedurave përmbarimore.
Sipas Latifit, nëse krahasohen edhe vitet e kaluara, shuma totale e mjeteve të tërhequra tejkalon 10 milionë euro. “Megjithëse dëme të ngjashme kanë pësuar edhe komuna të tjera të Republikës së Kosovës, Komuna e Rahovecit është veçanërisht e goditur,” tha Latifi. Ai shtoi se një deficit i tillë fondesh, sidomos kur tërhiqen përmes procedurave përmbarimore nga Thesari i Shtetit, shkakton një lloj paralize dhe pamundësie për operim të suksesshëm të komunave.
Latifi sqaroi se pjesa dërrmuese e mjeteve të tërhequra lidhet me kontratën kolektive, e cila po krijon pasoja zinxhir për funksionimin e komunës dhe realizimin e obligimeve ndaj operatorëve ekonomikë. Ai shpjegoi se nëse fondet tërhiqen nga buxhetet e destinuara për investime, mallra-shërbime ose subvencione për të përmbushur detyrimet e kontratës kolektive, atëherë operatorët ekonomikë, me të cilët komuna ka kontrata, mbeten pa pagesë. Kjo, në vijim, i detyron ata të ndjekin rrugën e përmbarimit, duke tërhequr sërish fonde nga komuna.
Kryetari Latifi theksoi se pasojat e kësaj situate po i bartin komunat dhe qytetarët, duke ndikuar drejtpërdrejt në realizimin e projekteve komunale. “Këto pasoja zinxhir janë veçanërisht të rënda për autoritetet komunale, ekzekutivin dhe, mbi të gjitha, për qytetarët e komunës, të cilët presin realizimin e projekteve dhe përmbushjen e shërbimeve,” tha ai.
Latifi argumentoi se qytetarët nuk janë të interesuar për burimin e fondeve, por për shërbimet e marra. Ai theksoi se qeveria qendrore duhej të siguronte fondet e nevojshme, por në vend të kësaj, komunat po mbajnë barrën financiare dhe pasojat e tjera. Kjo, sipas tij, e vështirëson jashtëzakonisht shumë realizimin e projekteve në Komunën e Rahovecit dhe ndikon drejtpërdrejt te qytetarët.