Ministri në detyrë i Bujqësisë, Pylltarisë dhe Zhvillimit Rural, Armend Muja, së bashku me përfaqësues të Agjencisë së Ushqimit dhe Veterinarisë (AUV), vizitoi sot pikat kufitare në Merdarë dhe Hani i Elezit. Qëllimi i kësaj vizite ishte monitorimi i zbatimit të kontrolleve fitosanitare dhe veterinare, si dhe i masave mbrojtëse për tregun e qumështit dhe produkteve të tjera ushqimore.
Sipas komunikatës së ministrisë, gjatë vizitës ministri Muja u informua mbi ecurinë e zbatimit të masave të reja. Këto masa përfshijnë vendosjen e akcizës për qumështin pluhur dhe produktet që përmbajnë vaj palme, si dhe forcimin e kontrolleve për produktet e qumështit, ushqimet dhe kafshët që hyjnë në Kosovë.
Gjithashtu, u bë e ditur se të gjitha produktet e qumështit, ushqimet dhe kafshët që importohen po i nënshtrohen kontrolleve të shtuara dhe analizave laboratorike nga AUV-ja. Kjo bëhet për të verifikuar përbërjen, për të respektuar standardet dhe për të garantuar cilësinë dhe sigurinë ushqimore.
Ministri Muja theksoi se zbatimi rigoroz i këtyre masave është thelbësor për mbrojtjen e tregut vendor dhe për krijimin e kushteve të barabarta për prodhuesit lokalë.
“Këto masa janë të domosdoshme dhe janë në interes të mbrojtjes së konsumatorit, garantimit të cilësisë dhe mbështetjes së prodhuesve vendorë dhe ekonomive familjare,” deklaroi Muja.
Ai shtoi se kontrollet e shtuara do të vazhdojnë në të gjitha pikat hyrëse, në mënyrë që çdo produkt që hyn në tregun vendor të jetë në përputhje me standardet e përcaktuara.
Muja vlerësoi angazhimin e AUV-së dhe institucioneve të tjera relevante në zbatimin e këtyre masave, duke theksuar rëndësinë e bashkëpunimit ndërinstitucional për garantimin e zbatimit të plotë të vendimeve.