**Dy incidente detare në Ngushticën e Hormuzit, pas të shtënave ndaj një cisterne**
Një incident i dytë ka ndodhur në Ngushticën e Hormuzit, disa orë pasi anijet luftarake iraniane qëlluan një cisternë që po kalonte nëpër këtë rrugë ujore. Kjo u bë e ditur nga Organizata e Trafikut Detar të Mbretërisë së Bashkuar (UKMTO), autoriteti detar përgjegjës për rajonin, siç raporton CNN.
Një anije konteinerësh u godit nga një “predhë e panjohur”, e cila shkaktoi dëme në disa prej konteinerëve. Ngjarja ndodhi rreth 25 milje detare (46 km) larg brigjeve të Omanit. UKMTO njoftoi se nuk ishte specifikuar se kush ishte përgjegjës për sulmin.
UKMTO theksoi gjithashtu se nuk janë raportuar zjarre apo dëme mjedisore dhe se autoritetet po hetojnë rrethanat e incidentit.
Ky incident i dytë erdhi menjëherë pasi UKMTO raportoi se anijet luftarake të Gardës Revolucionare Iraniane kishin qëlluar një cisternë që po lundronte nëpër të njëjtën ngushticë.
Të dyja ngjarjet u raportuan pak orë pasi Irani kishte rivendosur kufizimet për anijet që tentonin të lundronin nëpër ngushticë. Ky veprim ishte një përgjigje ndaj deklaratës së Presidentit të SHBA-së, Donald Trump, se bllokada amerikane e porteve iraniane do të vazhdonte.