**Musliu akuzon Kurtin për koordinim me Listën Serbe, thekson se historia nuk mund të rishkruhet**
Kryeministri në detyrë, Albin Kurti, është akuzuar nga deputetja e Partisë Demokratike të Kosovës (PDK), Ganimete Musliu, për bashkëpunim me Listën Serbe me qëllim të pengimit të konstituimit të Kuvendit të Kosovës para datës 16 shtator.
Nëpërmjet një postimi në rrjetet sociale, Musliu ka deklaruar se Kurti dhe Lista Serbe synojnë të parandalojnë formimin e legjislaturës së re para kësaj date. Ajo citoi: “Albin Kurti në koordinim të plotë me Listën Serbe nuk duan të kemi Kuvend para datës 16 shtator.”
Deputetja Musliu theksoi gjithashtu se, pavarësisht situatave politike aktuale, historia e Kosovës mbetet e pandryshueshme. Sipas saj, çdo përpjekje për ta rishkruar atë është e kotë: “E keni të kotë! Nuk do mund ta rishkruani historinë!”
Ajo përmendi disa nga lokalitetet simbol të luftës dhe sakrificës së shqiptarëve për liri, si Prekazi, Çirezi, Likoshani, Likoci, Reçaku, Abrina, Pokleku, Krusha dhe Meja. Musliu e përmbylli deklaratën e saj duke theksuar se kjo histori “është shkruar me gjakun dhe sakrificën e njerëzve tanë”.