**Picula: Serbia e Vuçiçit, destabilizuesi kryesor i rajonit; funerali i Mlladiqit duhet të ketë pasoja**
Eurodeputeti kroat dhe raportuesi i Parlamentit Evropian për Serbinë, Tonino Picula, ka bërë thirrje për një ndryshim rrënjësor të qasjes së Bashkimit Evropian ndaj autoriteteve në Beograd, pas funeralit të kriminelit të dënuar të luftës, Ratko Mlladiq. Ai theksoi se “Serbia e Vuçiçit është destabilizuesi kryesor i marrëdhënieve në Evropën Juglindore” dhe se glorifikimi i kriminelëve të luftës duhet të ketë pasoja.
Picula vuri në dukje se Serbia, nëse synon anëtarësimin në Bashkimin Evropian, duhet të refuzojë revizionizmin historik dhe glorifikimin e kriminelëve të luftës. Sipas tij, një politikë më e ashpër ndaj Beogradit është e domosdoshme, duke përsëritur se “Serbia e Vuçiçit është destabilizuesi kryesor i marrëdhënieve në Evropën Juglindore”.
Në një paraqitje në emisionin “Dnevnik” të HRT-së, Picula theksoi se varrimi i Mlladiqit, i dënuar përfundimisht për gjenocid, duhet të shërbejë si pikë kthese në marrëdhëniet e BE-së me presidentin serb, Aleksandar Vuçiç. “Funerali i kriminelit të luftës Ratko Mlladiq, i cili u dënua përfundimisht për gjenocid, duhet të ndryshojë në thelb politikën e gjatë të paqësimit ndaj Aleksandar Vuçiçit nga Bashkimi Evropian,” deklaroi Picula.
Ai kritikoi veçanërisht Komisionin Evropian dhe disa shtete anëtare me ndikim për qasjen e tyre ndaj Beogradit. “Udhëheqësit evropianë duhet më në fund të kalojnë nga faza e shokut në atë të reagimit ndaj asaj që Vuçiç ka bërë vazhdimisht për vite me radhë. Imuniteti i tij nga sanksionet duhet më në fund të hiqet dhe politika e nënshtrimit ndaj regjimit duhet refuzuar,” u shpreh ai. Sipas Piculës, një qeveri e tillë nuk mund të trajtohet më si një partner i privilegjuar dhe i paprekshëm i Brukselit në Ballkanin Perëndimor.
Eurodeputeti kroat foli edhe për zhvillimet në Bosnje e Hercegovinë pas funeralit të Mlladiqit, ku Ministri i Punëve të Jashtme, Elmedin Konakoviç, njoftoi dëbimin e dy personave nga Ambasada e Serbisë, ndërsa në ceremoninë mortore morën pjesë edhe përfaqësues të udhëheqjes politike të Republika Srpskas. “Funerali i një krimineli të dënuar lufte duhet të ketë pasoja për marrëdhëniet në Evropën Juglindore, e cila ende nuk i ka përthithur plotësisht pasojat e agresionit. Bosnja e Hercegovina është gjithashtu në periudhën parazgjedhore dhe kjo i ndez më tej tensionet në marrëdhëniet tashmë të tendosura në vend,” tha Picula.
Ai theksoi se në Parlamentin Evropian po rritet mbështetja për masa më të ashpra ndaj Serbisë. Përfaqësues të katër grupeve kryesore politike në PE i kanë dërguar letër Komisioneres Evropiane për Zgjerimin, Marta Kos, duke kërkuar reagim nga Komisioni Evropian, ndërsa janë shtuar thirrjet për ngrirjen ose pezullimin e procesit të anëtarësimit të Serbisë. Picula tha se një pjesë e eurodeputetëve e kanë mbështetur prej vitesh një mundësi të tillë dhe se tashmë vëmendja është te Presidentja e Komisionit Evropian, Ursula von der Leyen.
Sipas tij, rëndësi të veçantë do të ketë nëse von der Leyen, njësoj si Marta Kos, do ta anulojë vizitën e planifikuar në Beograd dhe çfarë qëndrimi do të mbajë ndaj autoriteteve serbe në fjalimin e saj për Gjendjen e Unionit në Strasburg.
“Ka ardhur koha për të ndryshuar situatën shumë qartë dhe për të ndërmarrë veprime më të ashpra kundër regjimit në Beograd,” theksoi Picula.
I pyetur nëse ende ka hapësirë për diplomaci dhe nëse Beogradi mund të heqë dorë publikisht nga glorifikimi i Mlladiqit, eurodeputeti kroat tha se nuk është optimist. “Vuçiç kishte 12 vjet për të realizuar atë që premtoi të bënte në Serbi. Asgjë nga kjo nuk ndodhi. Është e vështirë të pritet që Vuçiç të ndryshojë diçka deri në ditën e zgjedhjeve. Hapësira për diplomaci po ngushtohet,” përfundoi Picula.