**Policia e Ferizajt intensifikon kontrollet rrugore: Qindra gjoba dhe konfiskime në 24 orë**
Policia Rajonale e Ferizajt ka intensifikuar aktivitetet në terren me qëllim rritjen e sigurisë rrugore. Në 24 orët e fundit, njësitë policore të rajonit kanë shtuar praninë dhe kontrollet me synimin për të parandaluar aksidentet dhe për të siguruar respektimin e rregullave të trafikut.
Gjatë kësaj periudhe janë regjistruar katër aksidente trafiku: dy prej tyre me të lënduar (ku dy persona kanë pësuar lëndime) dhe dy vetëm me dëme materiale. Njëkohësisht, janë shqiptuar gjithsej 284 gjoba për kundërvajtje të ndryshme.
Gjobat e shqiptuara ndahen si vijon:
* 94 për tejkalim shpejtësie;
* 52 për parkim të parregullt;
* 24 për qarkullim me afat të skaduar regjistrimi të mjetit;
* 21 për mosrespektim të shenjave të trafikut;
* 10 për përdorim telefoni gjatë ngasjes;
* 9 për drejtim mjeti pa leje drejtimi (patentë shoferi);
* 4 për mospërdorim të rripit të sigurisë;
* 70 për kundërvajtje të tjera.
Për shkelje të rënda të rregullave të trafikut, janë konfiskuar gjithashtu: 4 automjete, 6 skuterë/motoçikleta dhe 3 leje drejtimi.
Policia Rajonale e Ferizajt u bën apel të gjithë pjesëmarrësve në trafik që të respektojnë rregullat, të tregojnë kujdes të shtuar gjatë ngasjes, me qëllim parandalimin e aksidenteve dhe rritjen e sigurisë rrugore.