Qendra Klinike Universitare e Kosovës (QKUK) ka shpallur një konkurs publik për plotësimin e tridhjetë (30) pozicioneve të kryeinfermierëve dhe kryelaborantëve. Këto pozita do të vendosen në klinika, institute dhe shërbime të ndryshme shëndetësore.
Sipas konkursit të publikuar nga Sektori i Personelit i QKUK-së, pozicionet e hapura përfshijnë kryeinfermierë në klinika të ndryshme specialistike, institute dhe shërbime klinike. Gjithashtu, janë parashikuar dy pozita për kryelaborantë në Klinikën e Biokimisë Mjekësore dhe në Shërbimin Klinik të Mikrobiologjisë, siç raportohet nga Gazeta Shneta.
Ndër klinikat ku do të ofrohen këto pozita janë Klinika Emergjente, Anesteziologjia dhe Mjekimi Intensiv, Neurokirurgjia, Pediatria, Neonatologjia, Pulmologjia, Onkologjia, Kardiologjia, Endokrinologjia, Gastroenterologjia, Nefrologjia, si dhe njësi të tjera të rëndësishme brenda QKUK-së.
Kontratat për kandidatët e përzgjedhur do të jenë me mandat katërvjeçar, me orar të plotë pune prej 40 orësh në javë.
Konkursi thekson se qëllimi kryesor i këtyre pozicioneve është udhëheqja, koordinimi dhe mbikëqyrja e shërbimeve infermierore në nivel klinikash, shërbimesh dhe institutesh. Kjo synon menaxhimin efikas të burimeve dhe ofrimin e një kujdesi shëndetësor cilësor e të sigurt për pacientët.
Kandidatët e interesuar mund të aplikojnë për pozitat e shpallura sipas kushteve dhe procedurave të përcaktuara në konkursin zyrtar të QKUK-së.