Cristiano Ronaldo nuk është stërvitur as të mërkurën me Përfaqësuesen e Portugalisë, duke munguar në stërvitjen e skuadrës për të tretën ditë radhazi.
Sipas raportimeve të fundit nga mediat portugeze, përfshirë “A Bola”, Ronaldo nuk ka marrë pjesë në përgatitjet e ekipit për ndeshjen e radhës në Ligën e Kombeve ndaj Danimarkës. Situata vjen pas fitores 2:1 ndaj Norvegjisë, ndeshje në të cilën 41-vjeçari nuk u aktivizua.
Trajneri Jorge Jesus kishte deklaruar më herët se Ronaldo do të rikthehej në stërvitje, por kjo nuk ka ndodhur.
Sipas raportimit të “A Bola”, Ronaldo kishte munguar edhe në seancën e së martës, ndërsa në atë rast Federata Portugeze kishte shpjeguar se sulmuesi kishte kryer punë individuale në palestër, pasi në stadiumin e Malmös mungonte një pajisje specifike që i nevojitej për programin e tij.
Megjithatë, situata është shoqëruar me raportime për tension mes kapitenit portugez dhe Jorge Jesus, pasi Ronaldo nuk u aktivizua fare ndaj Norvegjisë, pavarësisht se trajneri kishte thënë para ndeshjes se synonte ta përdorte gjatë saj.
Raportimi i fundit që po qarkullon në mediat portugeze thotë se Ronaldo tashmë është larguar nga grumbullimi i Portugalisë, duke e bërë edhe më të pasigurt praninë e tij në ndeshjen ndaj Danimarkës.
Portugalia dhe Danimarka përballen të enjten në kuadër të Ligës së Kombeve, ndërsa vëmendja tashmë është përqendruar te situata e Cristiano Ronaldos dhe marrëdhënia e tij me Jorge Jesus.