ZVICËR: Dy persona humbin jetën në një shpërthim me zjarr në hidrocentral
Dy persona kanë humbur jetën pas një shpërthimi të fuqishëm që u pasua nga një zjarr në një hidrocentral në jug të Zvicrës, njoftuan të martën autoritetet zvicerane.
Incidenti ndodhi në hidrocentralin e vendosur në fshatin Piota, në kantonin jugor të Ticinos. Policia bëri me dije se shpërthimi ishte pasuar nga flakë të mëdha, të cilat kapën dy punëtorët. Këta të fundit humbën jetën si pasojë e plagëve të rënda të marra.
Një prej viktimave është identifikuar si një shtetas zviceran 55-vjeçar, ndërsa identiteti i punëtorit tjetër nuk është bërë ende publik.
Shpërthimi shkaktoi dëme të konsiderueshme strukturore në ndërtesë. Menjëherë pas ngjarjes, autoritetet kompetente kanë nisur një hetim të thelluar për të zbardhur shkaqet dhe rrethanat e plota të këtij aksidenti tragjik.
Sipas transmetuesit shtetëror RSI, hidrocentrali, i cili konsiderohej i vjetër, ishte në proces rinovimi. Këto punime kryheshin si pjesë e një plani më të gjerë për modernizimin dhe rindërtimin e plotë të objektit.