Një kthesë e papritur pritet në procesin gjyqësor ndaj një 34-vjeçari nga Kosova në Gjermani, i cili akuzohet për një sulm me thikë. Autoritetet gjermane tashmë besojnë se autori i vërtetë i sulmit, i cili rrezikoi jetën e viktimës para “Vita-Bar” në Hamm, është vëllai i të akuzuarit, i cili aktualisht ndodhet në Kosovë. Vendimi i Gjykatës së Krimeve të Rënda në Dortmund pritet në mesin e korrikut, dhe i akuzuari nuk pritet të jetë më në paraburgim.
34-vjeçari kosovar ishte arrestuar në shtator, katër muaj pas sulmit. Fillimisht, Prokuroria e akuzonte për tentativë vrasjeje. Megjithatë, siç raporton mediumi gjerman WA.de, Prokuroria është tashmë e bindur se goditjet me thikë nuk u kryen nga i akuzuari, por nga vëllai i tij.
Përveç ngjashmërisë së madhe fizike mes dy vëllezërve, çka mund të ketë shkaktuar konfuzion, vëllai ka konfirmuar Gjykatës së Krimeve të Rënda se i akuzuari është i pafajshëm. Problemi qëndron në faktin se vëllai aktualisht ndodhet në Kosovë dhe nuk mund të vihet në dispozicion të drejtësisë gjermane.
Prova kyçe në këtë çështje janë mesazhet SMS. Një ditë pas sulmit me thikë, vëllai i të akuzuarit kishte shkëmbyer disa mesazhe me një të afërme. Këto mesazhe, të cilat u siguruan disa javë më parë nga telefoni i të afërmes dhe tashmë janë përkthyer, përmbanin dëshminë e qartë: “Kam bërë budallallëk. Kam goditur me thikë një kroat – rreth dhjetë herë”. Bazuar në këtë, Prokuroria ka deklaruar se i akuzuari nuk mund të mbajë përgjegjësi për goditjet me thikë që rrezikuan jetën e viktimës. Sidoqoftë, meqenëse ai e kishte goditur viktimën disa herë me grushte gjatë përleshjes para “Vita-Bar”, Prokuroria kërkoi nga gjykata dënimin e tij për lëndim trupor, me një vit burgim me kusht.
Avokatja mbrojtëse, Ina Klimpke, në fjalën e saj përfundimtare, kërkoi shpalljen e pafajësisë së klientit të saj. Ajo argumentoi se viktima ishte iniciatori i konfrontimit dhe klienti i saj kishte vepruar vetëm në vetëmbrojtje duke goditur. Nëse gjyqtarët megjithatë do të vendosnin për dënimin e tij për lëndim trupor, Klimpke sugjeroi një dënim prej katër muajsh burgim me kusht si masë të mjaftueshme.