**Reagim i fortë emocional: Shqiptarja Tiana Krasniqi i bërtet ‘Të dua’ bashkëshortit të ekzekutuar**
Tiana Krasniqi, një grua me origjinë shqiptare dhe bashkëshortja e James Broadnax, i bërtiti me dëshpërim “Të dua!” pak para se burri i saj të ekzekutohej në Teksas, i dënuar për një vrasje me armë zjarri që ai vazhdimisht e mohoi.
Broadnax, 37 vjeç, u shpall i vdekur të enjten, pas marrjes së një injeksioni vdekjeprurës në Huntsville, Teksas, një qytet rreth 110 kilometra (70 milje) në veri të Hjustonit. Lajmi u raportua nga SkyNews.
Gjatë gjithë procesit ligjor, Broadnax kishte pohuar se prokurorët kishin keqpërdorur tekstet e këngëve të tij rep, duke i përdorur ato për të siguruar dënimin e tij me vdekje, pavarësisht pretendimeve të tij për pafajësi.
Tiana Krasniqi, e cila në raporte të ndryshme identifikohet si me origjinë shqiptare, shprehu thellësisht emocionet e saj. Ajo bërtiti “Të dua!” ndërsa Broadnax po ndërronte jetë. Gjatë minutave të fundit, ajo u përkul drejt dritares së dhomës së ekzekutimit me krahët hapur dhe, pas përfundimit të procedurës, iu desh të ndihmohej për t’u larguar nga ambientet e burgut, e rrënuar nga dhimbja.