**Irani propozon plan paqeje me 14 pika për SHBA-në, Trump shprehet skeptik**
Irani ka paraqitur një propozim me 14 pika për t’i dhënë fund konfliktit me Shtetet e Bashkuara, përmes ndërmjetësimit të Pakistanit. Ky hap vjen ndërsa administrata e Presidentit Trump vazhdon të mbajë në fuqi bllokadën detare, shqyrton opsione ushtarake dhe miraton paketa të mëdha armatimi për aleatët në Lindjen e Mesme. Presidenti amerikan, Donald Trump, tashmë ka sugjeruar se propozimi i ri vështirë se do të pranohet.
Sipas agjencisë gjysmëzyrtare Tasnim, Teherani e ka dorëzuar këtë përgjigje me 14 pika, në kundërpërgjigje të një plani amerikan me nëntë pika për zgjidhjen e konfliktit.
Propozimi iranian kërkon përfundimin e plotë të armiqësive, duke refuzuar idenë e një “ngrirjeje” të përkohshme apo armëpushimi dy-mujor. Ai thekson zgjidhjen e çështjeve themelore brenda 30 ditëve. Për Iranin, prioritet duhet të jetë mbyllja përfundimtare e luftës, jo zgjatja e një armëpushimi të përkohshëm.
Ndër kërkesat kryesore të planit iranian janë garancitë kundër veprimeve ushtarake, tërheqja e forcave amerikane nga zonat rreth Iranit, heqja e bllokadës detare dhe sanksioneve ekonomike, zhbllokimi i aseteve të ngrira iraniane, pagesa e kompensimeve, si dhe ndërprerja e armiqësive në disa fronte, përfshirë këtu edhe Libanin. Gjithashtu, propozohet një rregullore e re për funksionimin e Ngushticës së Hormuzit, një korridor kyç energjetik që ka mbetur i mbyllur që nga fillimi i konfliktit më 28 shkurt.
“Topi është në fushën e SHBA-së”, deklaroi Ministria e Jashtme e Iranit, duke theksuar se vendi është i gatshëm si për rifillimin e negociatave, ashtu edhe për rikthimin në operacione ushtarake.
Pakistani ka luajtur një rol qendror në ndërmjetësim, duke kontribuar në arritjen e një armëpushimi në fillim të prillit dhe në organizimin e bisedimeve në Islamabad. Qëllimi i tij është të ruajë këtë rol deri në përfundimin e krizës.
Nga ana tjetër, reagimi i Presidentit Donald Trump ishte i rezervuar. Përmes platformës “Truth Social”, ai deklaroi se do ta shqyrtojë planin iranian, por shtoi se e konsideron të vështirë pranimin e tij. “Nuk mund të imagjinoj se do të jetë i pranueshëm, pasi nuk kanë paguar mjaftueshëm për atë që kanë bërë ndaj njerëzimit dhe botës gjatë 47 viteve të fundit,” u shpreh ai.