Zvicra ka ndërtuar mbi 40 ura dhe kalime të posaçme, të njohura si “ura të gjelbra”, mbi autostrada dhe rrugë të frekuentuara, duke u mundësuar kafshëve të egra si drerët, dhelprat e derrat e egër të lëvizin në mënyrë të sigurt. Këto vepra infrastrukturore lidhin habitatet natyrore që janë ndarë nga rrjeti rrugor, duke synuar ruajtjen e biodiversitetit.
Sipas Zyrës Federale të Rrugëve të Zvicrës (FEDRO), këto kalime janë thelbësore për zvogëlimin e pengesave që krijon infrastruktura rrugore, sidomos në zona ku qarkullojnë rreth 10.000 automjete në ditë.
Zvicra, si një prej vendeve pararojë në këtë fushë, ka identifikuar dhe hartëzuar më shumë se 300 korridore thelbësore për lëvizjen e kafshëve të egra në shkallë kombëtare. Këto korridore, vendndodhja e të cilave mund të shikohet në hartën interaktive të platformës zyrtare zvicerane Swisstopo, janë jetike për ruajtjen e biodiversitetit. Ato u mundësojnë kafshëve të gjejnë ushqim, strehim dhe të lëvizin lirshëm mes territoreve, pa u penguar nga ndërtimet rrugore.
Një shembull konkret i kësaj qasjeje novatore është ura në Koppigen. Këtu, inxhinierët kanë ndërtuar një urë druri me një hapësirë prej 37 metrash, duke përdorur teknika ndërtimi tipike për strukturat prej betoni. Kjo urë është projektuar për të mbajtur dhe dhe bimësi, duke krijuar një mjedis që imiton habitatin natyror të kafshëve. Pra, ajo shërben jo vetëm si kalim fizik, por edhe si një zgjatim i mjedisit natyror.
Efikasiteti i këtyre urave monitorohet vazhdimisht përmes kamerave, të cilat kanë regjistruar kalimin e suksesshëm të drerëve, vjedullave, kunadhave dhe iriqëve. Madje, në disa raste, kafshët janë vërejtur duke qëndruar për pak kohë në këto kalime, duke dëshmuar se ato shërbejnë si mjedise funksionale dhe të mirëpranuar nga fauna.
Me anë të planifikimit të kujdesshëm mjedisor, zgjidhjeve inxhinierike dhe monitorimit të vazhdueshëm, Zvicra po përpiqet të minimizojë ndikimin negativ të infrastrukturës rrugore mbi natyrën dhe të ruajë lidhjet jetike mes habitateve të kafshëve të egra.