**Arrestohet 22-vjeçari shqiptar në Itali, gjendet kokainë në ndarjen e airbag-ut të makinës**
Një shqiptar 22-vjeçar është arrestuar në Itali pasi Policia e Shtetit zbuloi 5.860 gramë kokainë, të fshehur në një ndarje të posaçme të automjetit me të cilin udhëtonte në autostradën A4.
Sipas njoftimit të Policisë së Shtetit, zbulimi u bë pranë komunës së Sonës, gjatë një kontrolli të kryer nga zyrtarët e Nënseksionit të Policisë së Autostradave Verona Sud.
I riu, banues në rajonin e Toskanës dhe me leje qëndrimi të vlefshme, udhëtonte i vetëm në drejtim të Milanos kur u ndalua nga një patrullë policore për një kontroll rutinë. Gjatë kontrollit, nervozizmi i tij dhe përgjigjet e paqarta lidhur me origjinën dhe destinacionin e udhëtimit çuan zyrtarët në verifikime të mëtejshme.
Gjatë kontrollit të automjetit, përvoja e zyrtarëve policorë mundësoi zbulimin e një ndarjeje të fshehur në hapësirën e airbag-ut të pasagjerit. Aty u gjetën pesë pako, të mbështjella me shirit ngjitës, ku secila ishte e shënuar me logon e një prodhuesi të njohur makinash. Pesha totale bruto e substancës arrinte në 5.860 gramë. Analizat e mëvonshme të kryera nga Policia Shkencore e Veronës konfirmuan se substanca e gjetur ishte kokainë.
Droga u sekuestrua, ndërsa 22-vjeçari u arrestua nën akuzën për posedim të lëndëve narkotike me qëllim shitjen. Pas arrestimit, ai u dërgua në burgun e Montorios, në dispozicion të autoritetit gjyqësor, i cili, pas vlerësimit të masës, urdhëroi paraburgimin.
Në njoftimin e Policisë së Shtetit theksohet se, në përputhje me parimin e prezumimit të pafajësisë, përgjegjësia penale e personit të arrestuar mund të konsiderohet e vërtetuar vetëm pas një vendimi penal të formës së prerë.