Jarrod Bowen u kërkon falje tifozëve të West Hamit pas rënies nga kategoria
Kapiteni i West Ham United, Jarrod Bowen, u ka kërkuar falje tifozëve pas rënies së skuadrës nga Premier League, duke i dhënë fund një qëndrimi 14-vjeçar në elitën e futbollit anglez. Rënia ndodhi të dielën, pavarësisht fitores 3-0 ndaj Leeds United në ndeshjen e fundit të sezonit.
Bowen u shpreh në rrjetet sociale, duke e cilësuar rënien nga kategoria si momentin më të rëndë të karrierës së tij. Sulmuesi, i cili shënoi golin fitues në finalen e Conference League në vitin 2023, pranoi se skuadra nuk ishte në nivelin e duhur.
“Është e vështirë të shkruash diçka të tillë kur ndien vetëm turp dhe dhimbje. Mund të shkruaja shumë për të shpjeguar çfarë shkoi keq këtë sezon, por ajo që meritoni nga unë është një kërkesë faljeje,” shkroi Bowen.
Ai shtoi se triumfi në Pragë kishte qenë nata më e bukur e karrierës së tij, ndërsa dita e rënies së West Hamit nga liga ishte më e keqja.
“Nuk ishim mjaftueshëm të mirë. Thjesht kaq. Dhe për këtë arsye sezoni përfundoi në këtë mënyrë,” deklaroi kapiteni i West Hamit.
Pavarësisht krizës dhe pakënaqësive ndaj drejtuesve të klubit, Bowen falënderoi tifozët për mbështetjen e vazhdueshme gjatë gjithë sezonit.
“Ju nuk na zhgënjyet asnjëherë. Mbështetja në shtëpi dhe në transfertë nuk ndryshoi kurrë, edhe kur ne nuk ishim në nivelin e duhur në fushë. Duhej t’ju jepnim më shumë. Ju meritonit më shumë,” theksoi ai.
Trajneri Nuno Espirito Santo, i cili zëvendësoi Graham Potterin në shtator, pritet të largohet pas rënies së skuadrës. Edhe pse skuadra pati përmirësime nën drejtimin e tij, portugezi nuk arriti ta shpëtonte West Hamin nga rënia.
“Është një moment trishtimi i thellë për të gjithë ne në klub. Ishte një ditë e vështirë dhe një mision i vështirë. Humbëm privilegjin për ta vendosur vetë fatin tonë,” deklaroi Nuno pas ndeshjes.
Tani West Hami do të përballet me një verë të vështirë riorganizimi, ndërsa pritet të ketë largime dhe ndryshime të rëndësishme në përbërje. Bowen, megjithatë, ka theksuar se fokusi i tij mbetet rikthimi i klubit në Premier League.
“Një gjë që e di për këtë klub është se ka vullnetin dhe forcën për t’u rikthyer. Ky klub i përket Premier League dhe meriton të rikthehet sa më shpejt,” përfundoi ai.