Interi synon yllin e Arsenalit si zëvendësues të Bastonit
Nëse Interi vendos të shesë Alessandro Bastonin te Barcelona, atëherë objektivi kryesor për zëvendësimin e tij është mbrojtësi i Arsenalit dhe Kombëtares së Italisë, Riccardo Calafiori, për të cilin është lakuar edhe një çmim i mundshëm.
Raportime të ndryshme në Spanjë dhe Itali kanë konfirmuar se Bastoni është zgjedhja e parë e Barcelonës për të përforcuar mbrojtjen gjatë verës, dhe Interi do të kërkonte rreth 80 milionë euro për largimin e tij. Marrëveshja mund të përfshijë edhe një lojtar në shkëmbim, duke e bërë transferimin më të lehtë për t’u realizuar.
Si pasojë, Interi duhet të mendojë për zëvendësimin e një prej shtyllave të mbrojtjes me tre qendërmbrojtës, dhe sipas burimeve të “L’Interista”, opsioni ideal është Calafiori.
Ai mbush 24 vjeç në maj dhe është gjithashtu pjesë e ekipit kombëtar të Italisë, njësoj si Bastoni, duke pasur një rol hibrid mes qendërmbrojtësit dhe mbrojtësit të majtë.
Arsenali pagoi 43.7 milionë euro, plus deri në 5 milionë euro bonuse, për ta transferuar Calafiorin nga Bologna në verën e vitit 2023. Megjithatë, problemet me dëmtimet dhe konkurrenca e fortë kanë bërë që ai të zhvillojë vetëm 29 ndeshje këtë sezon, prej të cilave 22 si titullar.
Sipas këtij raporti, Arsenali mund të jetë i gatshëm ta shesë për rreth 50 milionë euro, duke siguruar një fitim modest.
Interi do të përpiqej gjithashtu ta përdorte Calafiorin në rolin ku ai ndihet më rehat, në vend që ta aktivizojë si një mbrojtës i majtë i mirëfilltë.
Kjo mbetet një ide mjaft ambicioze për zikaltërit, të cilët zakonisht synojnë të mbajnë kostot të ulëta, por shitja e Bastonit do të sillte një fitim të madh financiar.