Kryeministri Edi Rama: Kërcënimet dhe ngacmimet ndaj protestuesve shfaqin frymën fashiste
Gjatë programit të tij audio “Flasim” të transmetuar sot, Kryeministri Edi Rama adresoi protestat që kanë shënuar ditën e 15-të.
Lidhur me atmosferën e protestave, Rama theksoi se një pjesë e sjelljeve të vërejtura burojnë nga individë që, sipas tij, ushtrojnë presion dhe kërcënojnë ata me mendime të ndryshme, duke i etiketuar disa prej tyre si “hajvanë”.
“Frymës fashiste nuk i nevojiten uniforma dhe armë. Fryma fashiste është ajo që proklamon: ‘Shqipëria është e shqiptarëve’, duke lënë të kuptohet se të gjithë të tjerët nuk janë të mirëseardhur. Njësoj si Gjermania e gjermanëve, e cila u shndërrua në ‘delen e zezë’ të Evropës për dekada. Ose si ‘Greqia është e grekëve’, slogan i përdorur nga ata ‘hajvanët’ e Agimit të Artë, që shkaktuan probleme serioze për Greqinë,” citoi kryeministri.
Ai shtoi: “Fryma fashiste shfaqet kur dikush deklaron: ‘Unë dua të flas, të shpreh mendimin tim, të protestoj, të qëndroj në bulevard’, por njëkohësisht nuk pranon dhe nuk lejon që të tjerët të kenë një opinion apo qëndrim të ndryshëm.” Sipas tij, “është e patolerueshme që një grup individësh, një forcë politike, një parti, apo një bashkim partish, t’i imponohet pjesës tjetër të shoqërisë, duke u thënë: ‘O do mendosh si unë, o unë do të të shkatërroj, do të të ngacmoj, do të të kërcënoj’.” Rama e cilësoi këtë sjellje si “fashiste dhe skandaloze, e cila duhet ndalur”. Kjo, tha ai, ndalet “duke mos u tërhequr përballë këtyre presioneve dhe para këtyre individëve”.