**Çmimi i naftës në Kosovë: Kur pritet ulja? Shpjegojnë tregtarët.**
Çmimi i naftës në bursat ndërkombëtare ka shënuar rënie edhe sot, në vijim të marrëveshjes mes Shteteve të Bashkuara të Amerikës dhe Iranit. Nafta e tipit Brent po tregtohet rreth 83 dollarë për fuçi, me një rënie prej mbi 4 për qind krahasuar me ditët e fundit, ndërkohë që tregjet globale sinjalizojnë një stabilizim të furnizimeve me energji.
Përfaqësues të tregut të derivateve të naftës në Kosovë kanë deklaruar se, nëse rënia e çmimit në bursat ndërkombëtare vijon me këtë ritëm, pritet që brenda afërsisht dy javësh të ketë një ulje të çmimeve të derivateve edhe në tregun vendas. Kjo ulje do t’i afronte çmimet me nivelet që ishin para fillimit të konfliktit mes SHBA-së dhe Iranit.
Sipas tyre, lëvizjet në tregun vendor zakonisht pasqyrojnë me disa ditë vonesë ndryshimet që ndodhin në bursat ndërkombëtare. Nëse nuk do të shfaqen tensione të reja gjeopolitike dhe çmimi i naftës vazhdon të bjerë, konsumatorët në Kosovë mund të përfitojnë nga çmime më të favorshme të benzinës dhe naftës gjatë pjesës së dytë të këtij muaji.
Tregjet globale mbeten optimiste se furnizimi me naftë do të normalizohet, ndërsa analistët presin që tendenca rënëse të vazhdojë edhe në ditët në vijim.