Organizata e Kombeve të Bashkuara (OKB) ka paralajmëruar se konflikti i vazhdueshëm në Lindjen e Mesme i ka kushtuar vendeve arabe rreth 186 miliardë dollarë, duke theksuar ndikimin negativ ditor mbi ekonominë globale. Një zyrtar i lartë i OKB-së bëri thirrje urgjente për ndërprerjen e veprimeve luftarake.
Zëvendëssekretari i Përgjithshëm i OKB-së, Abdalla al-Dardari, deklaroi nga Ammani se “shpresojmë që betejat të ndalen nesër, sepse çdo ditë vonese ka ndikime negative në ekonominë globale.”
Ai shtoi se “vlerësojmë që humbja në Produktin e Brendshëm Bruto (PBB) të rajonit arab pas një muaji luftimesh do të arrijë rreth 6%, që përkthehet në rreth 186 miliardë dollarë më pak për ekonominë.”
Al-Dardari theksoi se shtetet e pasura të Gjirit, të cilat janë vënë në shënjestër të sulmeve iraniane si hakmarrje ndaj ofensivës amerikano-izraelite, po përballojnë koston më të rëndë.
“Për më tepër, vlerësojmë se numri i vendeve të punës që do të humbasin si pasojë e këtij konflikti arrin rreth 3.7 milionë,” shtoi ai. Sa i përket ndikimit të luftës në varfëri, zyrtari paralajmëroi se “presim që edhe rreth 4 milionë persona në rajon të bien ose të jenë tashmë nën kufirin e varfërisë gjatë këtij muaji.”
Duke nënvizuar varësinë ekonomike të vendeve të Gjirit nga nafta, zyrtari i OKB-së theksoi domosdoshmërinë e gjetjes së rrugëve alternative përtej Ngushticës së Hormuzit, prej nga kalon normalisht një e pesta e naftës dhe gazit të lëngshëm natyror botëror.
“Ekonomia arabe mbështetet pothuajse vetëm te një produkt i vetëm,” u shpreh ai. “Vendet që nuk eksportojnë naftë varen nga transferimet e kapitalit nga diaspora në vendet eksportuese dhe nga ndihmat që vijnë prej tyre, ndërsa vetë vendet eksportuese kanë vetëm një produkt,” shpjegoi Al-Dardari.
“Ky fragilitet i ekonomisë arabe theksohet nga ngjarjet e fundit, të cilat tregojnë se ajo nuk është e qëndrueshme,” përfundoi zyrtari i OKB-së.