Zyrtarët e FIFA-s kanë vendosur një paralajmërim “First Alert” për qytetin e Filadelfias përpara ndeshjes së Grupit I mes Francës dhe Irakut.
Dy kombëtaret pritet të luajnë ndeshjen e tyre të dytë të fazës së grupeve në Kupën e Botës në orën 23:00, në një situatë ku kushtet atmosferike janë bërë një nga temat kryesore të turneut.
Nxehtësia e lartë ka dominuar diskutimet, veçanërisht për shkak të përdorimit të pushimeve për hidratim, por tani shqetësim i madh është edhe rreziku nga përmbytjet e menjëhershme dhe stuhitë në SHBA.
Sipas National Oceanic and Atmospheric Administration, periudha qershor–korrik është më e rrezikshmja për përmbytje të shpejta, të cilat mund të zhvillohen brenda 3 deri në 6 orë pas reshjeve të forta.
Autoritetet meteorologjike paralajmërojnë se rajoni i Filadelfias mund të goditet nga stuhi gjatë pasdites dhe mbrëmjes, me rrezik për reshje të rrëmbyeshme, erëra të forta dhe madje edhe tornado të izoluara.
“NBC10 Philadelphia” raportoi se periudha e rrezikut do të zgjasë nga ora 15:00 deri në 23:00 sipas kohës lokale, që përkon me zonën kohore EDT (Eastern Daylight Time), duke e vendosur ndeshjen në një dritare potencialisht problematike.
Gjithashtu ekziston rreziku për ndërprerje të energjisë elektrike, gjë që mund të ndikojë në sistemet teknologjike të FIFA-s, përfshirë teknologjinë e vijës së golit dhe VAR-in.
Sipas protokolleve të FIFA-s, një ndeshje duhet të ndalet ose të shtyhet nëse rrufeja godet brenda një rrezeje prej tetë miljesh nga stadiumi. Në atë rast:
- tifozët largohen nga tribunat
- lojtarët strehohen menjëherë
- loja rifillon vetëm pasi të kenë kaluar 30 minuta pa rrufe
Udhëzimet e National Oceanic and Atmospheric Administration theksojnë se aktivitetet duhet të ndalen nëse shihet rrufe, dëgjohet bubullimë ose nëse qielli duket “kërcënues”, me një rrezik që shtrihet deri në 6–10 milje nga stuhia.
FIFA do të monitorojë kushtet në kohë reale përmes radarëve meteorologjikë dhe sistemeve të detektimit të rrufeve, ndërsa një plan i posaçëm sigurie do të aktivizohet në rast emergjence.
Ndërprerjet për shkak të motit janë të rralla në futbollin elitar, por kanë ndodhur më parë, përfshirë Euro 2012 kur një ndeshje u ndal për rreth një orë, si dhe Euro 2024 kur një tjetër u pezullua për 25 minuta për shkak të stuhive me rrufe.
Nuk ka një afat zyrtar maksimal për sa kohë mund të shtyhet një ndeshje, por nëse ajo nuk mund të përfundojë, zakonisht rifillon nga minuta ku është ndalur në një datë tjetër – shumë gjasa të nesërmen, kur parashikimet tregojnë për përmirësim të motit./GazetaExpress/